Տավուշի մարզպետ. «Առաջիկա մի քանի տարիներին Տավուշի ներդրումային հիմնական ծրագրերը գյուղատնտեսության ոլորտում են»
Տավուշի մարզպետ Հայկ Չոբանյանն իր պաշտոնավարման 100 օրն ամփոփել է մարզի Ենոքավան համայնքում՝ խոստանալով, որ տարվա ընթացքում հանդիպումները Տավուշում ավելի շատ և ավելի հետաքրքիր են լինելու, քան մարզպետի ասուլիսն է:
Նա նշել է, որ բոլոր հարցերում մոտեցումը ռազմավարական է լինելու.
«Դրվագային ոչինչ չենք անելու: Առաջիկա մի քանի տարիներին Տավուշի ներդրումային հիմնական ծրագրերը գյուղատնտեսության ոլորտում են: Մենք օգտագործամ ենք մեր գյուղատնտեսական ներուժի չնչին մասը», - հայտնում է Aysor.am-ը:
«Իմ նպատակը եղել է կառավարման այնիպիսի մեխանիզմների ներդրում, որպեսզի կարողանանք մեր նպատակներն իրականացման հասնենք: Ամենամեծ ձեռքբերումը, որ այս հարցում ունենք, մարզի ամբողջ մարդկային ռեսուրսի ներգրավումն է մեր ծրագրերի մեջ, լինի գյուղատնտեսություն, տուրիզմ, մշակույթ, արդյունաբերություն, թե մեկ այլ ոլորտ», - ասել է Հայկ Չոբանյանը:
Մարզպետի խոսքով՝ սխալ է այն կարծիքը, որ գյուղացին չի աշխատում կամ ալարկոտ է: Նրա խոսքով՝ այսօր գյուղատնտեսությունը պարզապես շատ ցածր արդյունավետություն ունի.
«Պարտավոր ենք գյուղատնտեսությունը դարձնել արդյունավետ գյուղացու համար, որպեսզի գյուղացին կրկին սիրահարվի գյուղատնեսությանը: Երկու տարվա ընթացքում Տավուշում չի լինի չօգտագործված հող: Այսօր արդեն այս առումով մեծ առաջընթաց ունենք»:
Խոսելով ներդրումների մասին՝ մարզպետն ասել է, որ ներդրումային ծրագրերի իրականացման մեջ փողը վերջին տեղում է:
«Առաջին տեղում վստահությունն է», - ասել է Հայկ Չոբանյանը՝ հավելելով, որ մարզում գործում է «ներդրումային գրասենյակ» և մոտ 100 ներդրումային ծրագիր կա: