Կրթության նախարարը հերքել է Ապրիլյանի մասնակիցների ուսման վարձի զեղչը չեղարկելու լուրերը
ՀՀ կրթության, գիտության, մշակույթի, սպորտի և երիտասարդության նախարար Արայիկ Հարությունյան կառավարության հունիսի 6-ի նիստում հերքել է մամուլում շրջանառվող այն տեղեկությունը, թե Ապրիլյան պատերազմի մասնակիցների ուսման վարձավճարների զեղչերը չեղարկվել են:
«Ըստ ընթակարգի, գործընթացը տեղի է ունեցել մարտ ամսին, բոլորն դիմումները հավաքել են և փոխանցումներ արել են, այսինքն՝ եթե նույնիսկ շատ ցանկանայինք այդպիսի բան անել, չէին կարողանա: Ըստ հրապարակումների քաոսային իրավիճակ է բուհերում», - ասել է նախարարը:
Վարչապետ Նիկոլ Փաշինյանն արձագանքել է, որ մարդիկ կան, որոնք շատ են ուզում երկրում քաոսային իրավիճակ ստեղծել, չեն կարողանում, որոշում են մամուլում և սոցիալական ցանցերում այդպիսի տպավորություն ստեղծել:
«Լարված իրավիճակ, ներքաղաքական անկայունություն, պայթյունավտանգ իրավիճակ: Այսպես ասողները նույն շղթայի շրջանակներից են», - ասել է Փաշինյանը՝ դիմելով ՀՀ ազգային անվտանգության ծառայության տնօրեն Արթուր Վանեցյանին:
Նա նշել է, որ սա ազգային անվտանգության խնդիր է, և պետք է զբաղվել այդ հարցով:
«Այս մարդիկ հիբրիդային պատերազմ են վարում Հայաստանի Հանրապետության դեմ և այդ մարդկանց անուն, ազգանունը հայտնի է», - ասել է Փաշինյանը՝ պահանջելով լրջորեն զբաղվել այդ հարցով: