Լևոն Քոչարյան. «Ես կզարմանայի, եթե այլ որոշում լիներ»
ՀՀ երկրորդ նախագահ Ռոբերտ Քոչարյանին դեպի ՔԿՀ ուղեկցած որդին՝ Լևոն Քոչարյանը լրագրողների հետ զրույցում ասել է, որ դատարանի որոշումը լսելուց հետո հայրն ինքնակամ է ներկայացել։
Վերաքննիչ քրեական դատարանի որոշումը նրա համար զարմանալի չէր, ասել է՝ զարմանալի կլիներ, եթե այլ որոշում կայացվեր։
«Այս դատավորն արդեն գիտեինք, բազմաթիվ օրինակներ են բերվել, թե ինչպես է ենթարկվել դատախազությանը։ Նաև իր արածն աննախադեպ էր, չթողեցին պաշտպանական կողմը խոսեր։ Շատ կարևոր է այս պարագայում դատավորի անձը, որը տղամարդկություն կունենա ու կշարժվի օրենքով»,- ասել է Լևոն Քոչարյանը։
Նրա խոսքով, իրավական մասով կլինեն բողոքարկումներ, կլինեն նաև քաղաքական առումով քայլեր։
«Դրանց մասին կտեղեկացնենք»,- ասել է նա։
Նա պնդել է, գործը կարված է։ Նաև նշել է, որ ինքն էլ, հայրն էլ հույս ունեն, որ այս աբսուրդը մի օր կվերջանա։
Լրագրողների հարցերին պատասխանելուց հետո նա անցավ փողոցն ու մոտեցավ ի աջակցություն Ռոբերտ Քոչարյանի՝ ինքնաբուխ հավաքի մասնակիցներին։