Այսօր Տարածքային կառավարման և ենթակառուցվածքների փոխնախարար Հակոբ Վարդանյանը հայտարարել է, որ հուլիսի 10-ին ՀՀ էներգոհամակարգում տեղի ունեցած տատանումների վերաբերյալ այս պահին երկու վարկած կա՝ իրանական կողմից եկած հնարավոր տատանումները և ՀՀ երկու կայաններից մեկում առաջացած հնարավոր տեխնիկական խնդիրները:

Լրագրողների դիտարկամնը, թե երեկ ՀՀ վարչապետ Նիկոլ Փաշինյանը հայտարարել էր, որ ներքին խնդիրները բացառվում են, և տեղի ունեցածը միայն արտաքին գործոնի ազդեցություն է, Վարդանյանն ասել է.

«Վարչապետի հայտարարությունից հետո ուսումնասիրման դինամիկան փոխվել է, որովհետև վարչապետին մինչ այդ զեկուցվել է գործող վարկածները, սակայն մենք հիմա չենք բացառում, որ դա տեղի է ունեցել տեխնոլոգիական խնդրի պատճառով Երևանի ՋԷԿ-ում կամ Հրազդան ՋԷԿ-ի 5-րդ էներգաբլոկում»:

Փոխնախարարը նշել է, որ ամբողջական պատկերն ավելի պարզ կլինի ուսումնասիրություններից հետո և այժմ զուտ հավանական վարկածներ ասելը ճիշտ չի լինի:

«Չեմ կարող ասել, թե որն է ավելի հավանական տարբերակը. մենք Իրանի մեր գորընկերներից առաջին պահին ստացել ենք, որ իրենք ունեին վթար, դրանից հետո մենք ստացել ենք տեղեկություն, որ, ըստ իրենց, վթարը լոկալ է եղել և չի հասել մեր էլեկտրահաղորդման գծին: Հիմա այդ ամեն ինչը վերլուծվում է, ստուգվում է»,- լրագրողների հետ զրույցում ասել է Հակոբ Վարդանյանը:

Նա նշել է, որ հստակ արդյունքները կլինեն մոտ մեկ ամսվա ընթացքում.

«Միգուցե երկարի, չեմ կարող ասել, որովհետև բազմաթիվ տվյալներ են ճշտվում»,- ասել է Վարդանյանը: