12-ամյա աղջիկը դարձել է ԱՄՆ լավագույն երիտասարդ գիտնականը
12-ամյա Գիտանջալի Ռաոն հորինել է ջրում կապարի առկայությունը որոշող արագ և ոչ թանկ միջոց: Դրա համար նրան ԱՄՆ 2017-ի լավագույն երիտասարդ գիտնականի կոչում է շնորհվել, փոխանցում է BBC-ն:
Իր հայտնագործությամբ նա ցանկացել է օգնել Միչիգանի Ֆլինտ քաղաքին, որտեղ 2016-ին շատ բնակիչներ տուժել են քաղաքի ջրում առկա կապարից հիվանդանալով:
Սարքի միտքը Գիտանջալին հղացել է, երբ տեսել է, թե ինչպես են իր ծնողները ջուրն ստուգում թեստ գծիկի միջոցով: «Դա շատ հուսալի միջոց չէ: Անհրաժեշտ է լինում մի քանի անգամ փորձել՝ պարզելու համար, թե արդյոք ջուրը մաքուր է», - ասում է աղջիկը:
Նրա սարքի հիմքում ածխածնի նանոխողովակներից ֆիլտրն է, որը որոշում է կապարի առկայությունը: Սարքը հագեցած է նաև Bluetooth փոխանցիչով , որը թույլ է տալիս սմարթֆոնի էկրանին տեսնել թեստի արդյունքները:
Գիտանջալին մյուս երեխաներին խորհուրդ է տալիս երբեք չհանձնվել:
«Երբ ես նոր էի սկսել փորձեր անել, շատ հաճախ անհաջողություններ եմ ունեցել: Բայց հետո ես սովորեցի իմ սխալների վրա և հասկացա, որ անհաջողությունը ևս մեկ քայլ է՝ հաջողության հասնելու ճանապարհին», - ասում է Գիտանջալին: