ԱՄՆ-ն, Ֆրանսիան, Գերմանիան, Դանիան և մի շարք այլ երկրներ արտաքսում են ռուս դիվանագետներին
ԱՄՆ-ն պատրաստվում է 60 ռուս դիվանագետի արտաքսել և փակել Սիեթլում ՌԴ գլխավոր հյուպատոսությունը՝ ի նշան «Սկրիպալի գործով» Մեծ Բրիտանիայի իշխանությունների հետ համերաշխության: Այս մասին լրագրողներին հայտնել է ԱՄՆ վարչակազմից պաշտոնյան: Փոխանցում է tert.am-ը։
Սպիտակ տան բարձրաստիճան պաշտոնյայի հաղորդմամբ՝ ԱՄՆ-ն արտաքսում է ՌԴ դիվանագիտական առաքելությունների 48 աշխատակիցների և ՄԱԿ-ում առաքելության ևս 12 աշխատակցի:
«Այսօր նախագահ Դոնալդ Թրամփը հրահանգել է արտաքսել ԱՄՆ-ից հետախուզության տասնյակ ռուս սպաների և փակել Սիեթլում ռուսական հյուպատոսությունը՝ մեր սուզանավերի բազային դրա մոտ լինելու պատճառով»,- ասել է պաշտոնյան լրագրողներին:
«ԱՄՆ-ն ձեռնարկում է այդ գործողությունները ՆԱՏՕ-ի իր դաշնակիցների և ամբողջ աշխարհում իր գործընկերների հետ միասին՝ ի պատասխան Մեծ Բրիտանիայում ռազմական քիմիական զենքի կիրառման, որը վերջին դեպքն էր աշխարհում շարունակվող ապակայունացնող գործողությունների շարքում»,- հավելել է նա: