Հայաստանի Հանրապետության շուկայի վերահսկողության տեսչական մարմինը վերահսկողություն է իրականացնում ոչ պարենային արտադրանքի անվտանգության և չափումների միասնականության ապահովման, թանկարժեք մետաղներից պատրաստված իրերի հարգորոշման և հարգադրոշմման ոլորտներում:

Ստուգումների իրականացման ընթացքում Տեսչական մարմինը թիրախավորում է այն ոլորտները, որոնք ունեն առավել բարձր ռիսկայնության ցուցանիշ, մասնավորապես՝ օծանելիք և կոսմետիկ արտադրանքներ, խաղալիքներ, ավտոգազալիցքավորման ճնշակայաններ (ԱԳԼՃԿ), ավտոմոբիլային բենզին և դիզելային վառելիք, երեխաների և դեռահասների համար նախատեսված արտադրանք:

ՇՎՏՄ-ից տեղեկացնում են, որ այս ոլորտներում իրականացրած ստուգումների արդյունքում բացահայտվել են տարբեր բնույթի խախտումներ, որոնցից.

- Օծանելիք և կոսմետիկ արտադրանք - արտադրանքն իրացվել է առանց համապատախսանության գնահատման փաստաթղթի և մակնշման,

- Խաղալիքներ - արտադրանքն իրացվել է առանց համապատախսանության գնահատման փաստաթղթի և մակնշման,

- ԱԳԼՃԿ - վաճառքն իրականացվել է խորանարդ մետրով` կիլոգրամի փոխարեն, ճնշումը գերազանցել է թույլատրելի չափը,

- Ավտոմոբիլային բենզին և դիզելային վառելիք - վառելիքի փորձարկման արդյունքների ցուցանիշները չեն համապատասխանել տեխնիկական կանոնակարգով սահմանված անվտանգության ցուցանիշններին՝ օկտանային թվի և ծծմբի պարունակության անհամապատասխանություն,

- Երեխաների և դեռահասների համար նախատեսված արտադրանք - արտադրանքն իրացվել է առանց համապատախսանության գնահատման փաստաթղթի և մակնշման:

Ստուգումների ընթացքում բացահայտված խնդիրների վերացման և կանխարգելման նպատակով Տեսչական մարմինը իրազեկում հանդիպումներ է կազմակերպել տնտեսվարողների հետ թե Երևանում և թե մարզերում: Երևանում կազմակերպվել է հանդիպում երեխաների և դեռահասների համար նախատեսված, օծանելիք և կոսմետիկ, ինչպես նաև պետական գրանցման ենթակա ոչ պարենային այլ արտադրանք ներմուծող, արտադրող և իրացնող տնտեսվարողների հետ:

Մարզերում կազմակերպվել են հանդիպումներ ԱԳԼՃԿ-ների, բենզալցակայանների և ոչ պարենային արտադրանք ներմուծող, արտադրող և իրացնող տնտեսվարողների հետ: Հանդիպումների ընթացքում տնտեսվարողներին ներկայացվել են տեխնիկական կանոնակարգերի պահանջները, դրանց պարտադիր պահպանման հետ կապված՝ նրանց իրավունքներն ու պարտականությունները, ոլորտը կարգավորող օրենսդրական փոփոխությունները:

«Շուկայի վերահսկողության տեսչական մարմինը կոչ է անում բոլոր սպառողներին՝ լինել հանրային վերահսկող, պահանջատեր, չգնել առանց մակնշման և համապատասխանության գնահատման փաստաթղթի առկայության արտադրանք՝ որքան էլ դրանք ունենան մատչելի արժեք: Հայաստանում պետք է ձևավորվի իրացնող-սպառող շուկայական հարաբերությունների մշակույթ, որը կապահովի բացառապես անվտանգ և որակյալ արտադրանքի առկայություն հայաստանյան շուկայում», - նշված է տեսչական մարմնի տարածած հաղորդագրությունում: