ԱՄՆ-ի վերջնագիրը. Վաշինգտոնը Մոսկվային 60 օր է տվել միջուկային համաձայնագրի պահանջները կատարելու համար
Միացյալ Նահանգները Ռուսաստանի Դաշնությանը 60 օր է տվել 1987թ. ԱՄՆ և ԽՍՀՄ ղեկավարներ Ռոնալդ Ռեյգանի ու Միխայիլ Գորբաչովի կնքած «Միջին և փոքր հեռահարության հրթիռների ոչնչացման մասին» համաձայնագրի շրջանակում ստանձնած պարտավորությունների կատարման համար: Հակառակ դեպքում` Վաշինգտոնը սպառնում է լքել համաձայնագիրն ու նոր հրթիռներ ստեղծելու, փորձարկելու, տեղակայելու հնարավորություն ստանալ:
Ռուսաստանին նման վերջնագիր է ներկայացրել ԱՄՆ պետքարտուղար Մայք Պոմպեոն, որն այս մասին հայտարարել է Բրյուսելում ՆԱՏՕ-ի անդամ պետությունների արտգործնախարարների հետ հանդիպումից հետո:
Պաշտոնյան ընդգծել է, որ Ռուսաստանը խախտում է համաձայնագրի պահանջները՝ ստեղծելով արգելված հրթիռներ:
«Հաշվի առնելով այս փաստերը՝ Միացյալ Նահանգները հայտարարում է, որ Ռուսաստանը խախտել է համաձայնագրի կանոնները: Եվ եթե Ռուսաստանը 60 օրում չվերադառնա իր ստանձնած պարտավորությունների ամբողջական կատարմանը, մենք ևս կդադարեցնենք մեր պարտավորությունների կատարումը»,- ասել է Պոմպեոն:
ԱՄՆ-ի դիրքորոշումը գուժում է աշխարհում սպառազինման նոր խոշոր մրցավազք, ինչն առաջին հերթին լուրջ խնդիրներ կառաջացնի Եվրոպայի համար: Հայտնի է, որ հիշյալ համաձայնագրի շնորհիվ միջուկային մարտագլխիկներով հրթիռները երեք տասնամյակից ավելի չեն տեղակայվել Եվրոպայի տարածքում:
ՌԴ արտաքին քաղաքական գերատեսչության մամուլի խոսնակ Մարիա Զախարովան, մեկնաբանելով Պոմպեոյի հայտարարությունը, նշել է, որ Մոսկվան հետևում է համաձայնագրի բոլոր պահանջներին:
«Եվ ամերիկյան կողմն այդ մասին գիտի»,- ասել է Զախարովան:
Հիշեցնենք, որ հոկտեմբերին Միացյալ Նահանգների նախագահ Դոնալդ Թրամփը հայտարարել էր, որ Վաշինգտոնը դուրս կգա «Միջին և փոքր հեռահարության հրթիռների ոչնչացման մասին» համաձայնագրից:
Փորձագետներն ահազանգել են, որ ԱՄՆ-ի դուրս գալու դեպքում կսկսվի 1980-ական թվականներից ի վեր միջուկային սպառազինության ոլորտում ամենալուրջ ճգնաժամը:
Հայտնի է, որ պատմական համաձայնագրի շրջանակում ԱՄՆ-ն ու Ռուսաստանը պարտավորվել են ոչնչացնել գործողության միջին և փոքր շառավղով բալիստիկ ու թևավոր հրթիռներն ու այլևս չզբաղվել դրանց արտադրությամբ: