Դավիթ Շահնազարյան․ «Ես ԱԱԾ չեմ գնա, ժամանակ չունեմ»
ՀՀԿ համամասնական ցուցակի երրորդ հորիզոնականը զբաղեցնող Դավիթ Շահնազարյանը Ազգային անվտանգության ծառայություն չի գնա։ Նա նշել է, որ չի պատրաստվում մեկնաբանել ԱԱԾ հայտարարությունը։ Այս մասին հայտնում է Պանորամա-ն։
«Ես լրագրողներին ժամը 14։00-ին հրավիրում եմ Հանրապետական կուսակցության գրասենյակ, որտեղ հանդես կգամ հայտարարությամբ։ Անկեղծ ասած, ես պատրաստվում էի այսօր ժամը 13։00-ին գնալ, բայց քանի որ ԱԱԾ-ն որոշեց դա հրապարկայնորեն անել, ես արդեն չեմ գնա, ժամանակ չունեմ, ավելի լավ է լրագրողների հետ շփվեմ»,- ասել է Շահնազարյանը։
Հարցին, թե կներկայացնի՞ այն նյութերը, որոնք պատրաստվում էր տրամադրել Ազգային անվտանգության ծառայությանը, Դավիթ Շահնազարյանն արձագանքել է.
«Ես ԱԱԾ-ին ոչ մի բան չեմ պատրաստվում ներկայացնել բացարձակապես։ Եկեք պարզ կլինի ամեն ինչ»։
Հիշեցնենք, որ ԱԱԾ-ն այսօր տեղեկացրել է, Դավիթ Շահնազարյանը գրությամբ դեկտեմբերի 5-ին հրավիրվել է ՀՀ ԱԱԾ վարչական շենք՝ հաղորդման կապակցությամբ, ըստ էության, բացատրություն տալու և այն հիմնավորող փաստաթղթեր և այլ նյութեր ներկայացնելու համար:
Դավիթ Շահնազարյանը Սասուն Միքայելյանի հայտարարությունը մեկնաբանելիս ասել էր.
«...Այն, ինչ ասել է Սասուն Միքայելյանն, իրականում դա քաղաքական ծրագիր է, որը իրականացնում է Նիկոլ Փաշինյանը, այսինքն՝ իշխանություն՝ Արցախի փոխարեն: Ես խոստանում եմ, որ դուք բոլորդ դրանում կհամոզվեք: Այնպես, որ Սասուն Միքայելյանն ուղղակի արտահայտել է այն, ինչը հանդիսանում է ներկայիս իշխանությունների քաղաքական նպատակը», ըստ էության դրանով իսկ ներկայիս իշխանությանը և վարչապետի պաշտոնակատար Նիկոլ Փաշինյանին մեղադրելով պետական դավաճանության մեջ»։