ԱՄՆ Պետքարտուղարությունը հավանություն է տվել Թուրքիային Patriot ՀՀՊ-ի վաճառքի 3,5 մլրդ դոլարի հնարավոր գործարքին:

Այս մասին հայտնել են Պենտագոնի պաշտպանության և անվտանգության ոլորտում համագործակցության հարցերով գործակալությունից, news.am-ի փոխանցմամբ, հայտնում է «ՌԻԱ Նովոստի»-ն:

Անկարան ԱՄՆ-ից թույլտվություն էր խնդրել գնելու Patriot-ի 4 լրակազմ՝ 20 արձակման կայանքներով և 80 որսող հրթիռներով:

Պենտագոնից պարզաբանել են, որ Թուրքիան մտադիր է համալիրն օգտագործել իր ՀՀՊ ներուժն ամրապնդելու, տարածքային ամբողջականությունը պաշտպանելու և տարածաշրջանային սպառնալիքները զսպելու համար:

Գերատեսչությունից հավելել են, որ վաճառքը նախատեսված է Թուրքիայի պաշտպանական հնարավորությունների մեծացման համար՝ «թշնամական ագրեսիայից պաշտպանվելու և ՆԱՏՕ-ի դաշնակիցներին պաշտպանելու նպատակով»:

Թույլտվություն տրամադրելու մասին տեղեկությունը հրապարակվել է մի շարք հարցերով 2 երկրների հարաբերություններում լարվածության ֆոնին:

Վաշինգթոնի դժգոհությունն էր հարուցել, մասնավորապես, ռուսական Ս-400 ՀՀՊ համալիրներ գնելու Թուրքիայի ծրագիրը: ԱՄՆ-ն ակտիվորեն հանդես էր գալիս դրա դեմ՝ սպառնալով պատժամիջոցների սահմանմամբ: