«Շատերն Ապրիլյան մարտերի հետ կապ չունեն, սակայն իրենց հռչակել են հերոս». «Ապրիլյան մարտական գործողությունների մասնակիցների միության» անդամ՝ Շուլի Հակոբյան
Ապրիլյան պատերազմի գործողությունների մասնակից տղաները ստեղծել են «Ապրիլյան մարտական գործողությունների մասնակիցների միություն»: Միության անդամ Շուլի Հակոբյանը Armdaily.am-ի հետ զրույցում նշեց, որ միությունը ստեղծվել է 2018թ-ի օգոստոսին.
«Մեր միության նպատակն է համախմբել ապրիլյանի մասնակից տղաներին»:
Շուլիի խոսքերով շատ տղաներ իրենց հռչակել են ապրիլյանի մասնակից.
«Իրենք իրենց հռչակում են հերոս, խառնվում են քաղաքականությանը, զբաղվում են քարոզարշավով: Բայց իրականում նրանք ընդահանրապես կապ չունեն Ապրիլյան մարտերի հետ: Մենք մեր միության մեջ փորձում ենք միավորել այն տղաներին, ովքեր իրականում մասնակցել են ապրիլյանին»:
Միության այցը ֆինանսավորել է Նիդեռլանդների՝ «Նոր Հայաստան Միություն» Belgium Lanaken-ի կողմից.
«Նիդեռլանդներում շատ մտերիմ ընկեր ունենք, ով միջնորդ է հանդիսացել: Մնացյալ ֆինանսավորումն էլ արել ենք մենք՝ մեր ուժերով»:
Միության անդամները հերթով Հայաստանի բոլոր մարզերի տղաներին՝ ովքեր մասնակցել են Ապրիլյան մարտերին, անդամագրելու են միությանը: 2019թ-ի հունվարի 5-ին «Ապրիլյան մարտական գործողությունների մասնակիցների միությունը» այցելել էր Արցախի հյուսիս-արևելյան շրջանի մարտական դիրքեր.
«Գնացել էինք Ամանորյա ու սուրբծննդյան տոների առթիվ՝ շնորհավորանքի և գնահատանքի խոսքը հղելու մեր հայրենիքի պաշտպաններին»։
Այցի սկզբում Արցախի Մատաղիս գյուղում տեղակայված զորամասում կազմակերպվել է համերգ.
«Համերգն անցավ շատ ջերմ ու ուրախ մթնոլորտում։ Երաժիշտներ Նվեր Շահնազարյանը, Արմեն Շահնազարյանը,Կամո Ավետիսյանը, Համո Իսրայելյանը, Ժորա Բաղդասարյանը, Արման Սրափյանը և Կարեն Մելքոնյանն առանց մեկ վայրկյան վարանելու մեզ հետ բարձրացան դիրքեր և փորձեցին տոն դարձնել մեր զինվորների տոնը: Նաև ուզում եմ Արթուր Աֆրիկյանի անունը նշել, ով միշտ փորձում է ստվերում մնալ, սակայն այս այցի ընթացքում մեզ շատ է օգնել»:
Այնուհետև տեղի է ունեցել այցելություն մարտական դիրքերից մի քանիսը: Տղաների հետ մարտական դիրքեր է այցելել նաև Արցախի հերոս, գեներալ-լեյտենանտ Արշավիր Ղարամյանը.
«Ղարամյանն իր կնոջ 50 ամյակի օրով մեզ հետ եկել էր: Կինն էլ իր ձեռքով ծանրոցներ էր պատրաստել և ուղարկել զինվորներին»:
Շուլի Հակոբյանը նշեց, որ այցեր Արցախ և մարտական դիրքեր կրկին սպասվում են.
«Մեր այցերը շարունակական բնույթ են կրելու, մենք դեռ շատ ծրագրեր ունենք իրականացնելու: Նաև պատրաստվում ենք մամուլի ասուլիս հայտարարել, որի ընթացքում կխոսենք միության առաջիկա ծրագրերի մասին»,- եզրափակեց Շուլին: