Նախկին գլխավոր դատախազ և քննչական կոմիտեի նախագահ Աղվան Հովսեփյանի միջնեկ որդին՝ Միսակ Հովսեփյանը, նոր ընկերություն է ձեռք բերել Չեխիայում: «Հետքը» նախկինում գրել է, որ Հայաստանում հէկերի բիզնեսում ներգրավված Մ. Հովսեփյանը 2010թ-ին Պրահայում հիմնել է «OMIRA» անունով ՍՊԸ:

Հիշեցնենք, որ հաճախ օտարերկրացիները, այդ թվում՝ մեր հայրենակիցները, Չեխիայում ձևական ընկերություններ են հիմնում կամ ձեռք բերում՝ նպատակ ունենալով ոչ թե բիզնես գործունեություն ծավալել, այլ հեշտացնել այդ երկրում անշարժ գույք գնելու, քաղաքացիություն ձեռք բերելու կամ պարզապես երկարաժամկետ վիզա կամ էլ երկարաժամկետ կացության թույլտվություն ստանալու գործընթացները: Ֆիկտիվ ընկերությունների միջոցով սովորականից (օտարերկրացիները Չեխիայում կես տարվա մեջ կարող են մնալ առավելագույնը 90 օր) ավելի երկար մնալու արտասահմանցիների փորձերին քաջածանոթ են Չեխիայի ներքին գործերի նախարարությունում ու դեսպանատներում, որոնք սկսել են երկարաժամկետ վիզա կամ երկարաժամկետ կացության թույլտվություն խնդրող եւ իբր գործարարությամբ զբաղվող ավելի շատ մարդկանց մերժել:

Ավելի վաղ հայտնի էր դարձել, որ չեխական ռեգիստրում Միսակ Հովսեփյանի «OMIRA» ընկերության վերաբերյալ որևէ փաստաթուղթ 2013թ-ից այս կողմ չկա, բայց այն լուծարված էլ չէ: Դրա գործունեության ոլորտներ են նշված անշարժ գույքի վարձակալությունը, առևտուրն ու ծառայությունների մատուցումը (ըստ չեխական ռեգիստրի տվյալների): Նախորդ հոդվածում հայտնել էինք նաև, որ «OMIRA»-ի կամ Մ. Հովսեփյանի անունով որեւէ անշարժ գույք գրանցված չէ:

Հովսեփյանի նոր ընկերությունն ինքը չի հիմնել: «TRANSFRUKT» ՍՊԸ-ն հիմնադրվել է 1991թ-ի մայիսի 23-ին Պրահայում: Գրանցել ու երկար ժամանակ ղեկավարել են տեղացիներ: Ընկերությունը նախկինում, ըստ չեխական ռեգիստրի, զբաղվել է տարբեր գործունեությամբ՝ մրգի ու բանջարեղենի մեծածախ ու մանրածախ ներկրում և արտահանում, ապրանքների վերավաճառք, միջնորդական գործունեություն առևտրի և ծառայությունների ոլորտում, շարժական գույքի վարձակալություն, անշարժ գույքի գործակալության գործունեություն: Սակայն 2017թ-ից ի վեր ՍՊԸ-ն զբաղվում է միայն անշարժ գույքի, բնակելի և ոչ բնակելի տարածքների վարձակալությամբ, ինչպես նաև որոշ տեսակի առևտրով ու ծառայությունների մատուցմամբ:

Ընկերության կանոնադրական կապիտալն ի սկզբանե եղել է 1,76 մլն կրոն, ապա դարձել 4,76 մլն, իսկ 1997թ-ից մինչ օրս 865 հազ. կրոն է, ինչը ներկա փոխարժեքով հավասար է 18 մլն դրամի: Երևանցի Միսակ Հովսեփյանը «TRANSFRUKT»-ը ձեռք է բերել Պրահայի 5 բնակիչներից 2018թ-ի դեկտեմբերի 20-ին՝ դառնալով միակ սեփականատերն ու տնօրենը: Այս գործարքի փաստաթուղթը ռեգիստրում վերջինն է, այսինքն՝ նախկին դատախազի որդու ղեկավարման օրոք որևէ բան չի ներկայացվել:

Ընկերությունը նախկինում գրանցված է եղել Պրահայի Ժիժկով թաղամասի Յան Ժելիվսկու 2200/2 հասցեում, որը երկաթուղու բեռնային համալիր է: Այն «Չեխական երկաթուղիներ» («České dráhy») պետական բաժնետիրական ընկերության սեփականությունն է: Մ. Հովսեփյանի կողմից ձեռք բերվելուց հետո ՍՊԸ-ն տեղափոխվել է նույն փողոցի 2726/2 հասցե (Žižkov, Jana Želivského 2726/2), որը նույնպես երկաթգծի հարեւանությամբ է:

Չեխական կադաստրի համաձայն՝ այս հասցեի հողը (2327 քմ) «Չեխական երկաթուղիների» սեփականությունն է, իսկ ահա դրա վրա գտնվող շինությունը, որում տեղակայված են տարբեր ընկերությունների պահեստներ, ինչպես նաև հոսթելներ, պատկանում է «TRANSFRUKT»-ին, այսինքն՝ Միսակ Հովսեփյանին: