Ավետիք Էլոյան․ «Նախատեսվում է մինչև 2020թ-ին ավարտին հասցնել աղետի գոտում անօթևան մնացած 542 ընտանիքի հարցի լուծումը»
Աղետի գոտու բնակավայրերում երկրաշարժի հետևանքով անօթևան մնացած ընտանիքների բնակարանային խնդիրների լուծման նպատակով պետական աջակցությամբ իրականացվող բնակարանով ապահովման ծրագրի շրջանակներում Շիրակի, Լոռու և այլ բնակավայրերում շահառու է ճանաչվել 5 հազար 381 ընտանիք, որոնցից 4 հազար 839 ընտանիքն ապահովվել է բնակարանով 2008-2017թթ-ի իրականացված ծրագրերի հաշվին։ Այդ մասին Գյումրիում՝ կառավարության արտագնա նիստի ժամանակ զեկուցեց քաղաքաշինության պետական կոմիտեի նախագահ Ավետիք Էլոյանը։
Ընդհանուր գումարն, ըստ Էլոյանի, կազմել էր 65 միլիարդ դրամ։
«Հայաստանի կառավարության 2018-2022թթ-ի գործունեության միջոցառումների ծրագրով նախատեսված է մինչև 2020թ-ն ավարտին հասցնել մնացած 542 ընտանիքների նկատմամբ ձևավորված պետական պարտականությունների կատարումը։ 2019թ-ի պետական բյուջեով արդեն նախատեսված է 560 միլիոն դրամ աշխատանքների համար», - ասաց Էլոյանը։