Կենտրոնի թաղապետ. «Օպերայի սրճարանների բողոքի ակցիա իրականացնող աշխատակիցներն ուղղորդված են, այլ սրճարանները եկել, աշխատանք էին առաջարկում, որևէ մեկը չմոտեցավ»
Կենտրոնի թաղապետ Վիկտոր Մնացականյանը լրագրողների հետ զրույցում նշել է, որ քաղաքապետարանը օրենքով սահմանված կարգով մեկ ամիս առաջ ծանուցել է Օպերայի հարակից տարածքների սրճարանատերերին, որ պետք է ապամոնտաժվեն:
Նա ասել է, որ այդ ակցիայի մասնակիցներից շատերն ուղղորդված են:
«Դուք սեփական աչքերով տեսաք, որ այլ սրճարանների աշխատակիցները եկել էին իրենց մոտ աշխատանք առաջարկելու, սակայն տեսաք ինչպես վերաբերվեցին այդ մարդկանց: Սարյանի, Կասկադի սրճարանների աշխատակիցները եկել աշխատանք էին առաջարկում, որևէ մեկը չմոտեցավ, հստակ ուղղորդված են», - ասել է թաղապետը:
Նա նաև նշել է, որ բոլոր սրճարաններն ունեն իրենց այն հատվածը, որը չի ապամոնտաժվելու:
«Այս սրճարանների տերերը գերշահույթ են ստանում, և որևէ մեկը խնդիր չունի ընտանիք պահելու: Ավելին, մենք հնարավորություն ենք տվել զբոսայգու աղեղաձև հատվածում իրենց գործունեությունը շարունակելու», - ասել է նա: