«Սպայկայի» աշխատակիցները բողոքի ակցիա են իրականացնում դատարանի դիմաց
«Սպայկա» ընկերության հարյուրավոր աշխատակիցներ փորձում են արգելափակել Տիգրան Մեծ պողոտան:
Նրանք ավելի վաղ բողոքի ակցիա էին սկսել Երևան քաղաքի ընդհանուր իրավասության դատարանի շենքի մոտ՝ ընկերության տնօրեն Դավիթ Ղազարյանին ազատ արձակելու պահանջով:
Ղազարյանին տեղափոխում են կալանավայր: Աշխատակիցները փորձում են խոչընդոտել:
Ժամը 11:40-ի դրությամբ Ղազարյանին տեղափոխող մեքենան հեռացել է դատարանի շենքի մոտից:
Հիշեցնենք, որ ավելի վաղ Երևան քաղաքի ընդհանուր իրավասության դատարանը որոշել է կալանավորել Ղազարյանին: Նրան մեղադրանք է առաջադրվել ՀՀ Քրեական օրենսգրքի 205-րդ հոդվածի 2-րդ մասով (Հարկը, տուրքը կամ պարտադիր այլ վճարը չվճարելը): Ըստ ՀՀ ԿԱ պետական եկամուտների կոմիտեի հաղորդագրության, ընկերությունը $7 մլրդ դրամի հարկ է թաքցրել:
Ղազարյանը չի ընդունում առաջադրված մեղադրանքը: Նա ավելի վաղ լրագրողների հետ զրույցում նշել էր, որ չի կարծում՝ իրեն առաջադրված մեղադրանքը քաղաքական պատվեր է: