ՀՀ Տավուշի մարզի ընդհանուր իրավասության դատարանի նախկին դատավոր Արման Օհանյանը, որը 2019թ-ի փետրվարից զբաղեցնում է Կոտայքի մարզի ընդհանուր իրավասության դատարանի դատավորի պաշտոնը, դեռևս 2016թ-ին՝ պաշտոնը ստանձնելուց հետո բարձրաստիճան պաշտոնատար անձանց էթիկայի հանձնաժողով էր ներկայացրել իր գույքի և եկամուտների հայտարարագիրը:

Օհանյանն ունի 6 անշարժ գույք՝ 2 առանձնատուն, 1 բնակարան, 1 հասարակական նշանակության շինություն և 2 կիսակառույց շինություն: Օհանյանը հայտարարագրել է 2 ավտոմեքենա՝ «MERCEDES-BENZ G500» և «MERCEDES-BENZ GL 500 4 MATIC» մակնիշների:

Պաշտոնը ստանձնելուց Օհանյանն ունեցել է 85 մլն դրամ, 110 հազար դոլար և 85 հազար եվրո: Պաշտոնը ստանձնելու ժամանակ Օհանյանը եկամուտների մեջ հայտարարագրել էր նաև ստացված 10 հազար դոլարի չափով նվիրատվության կամ օգնության կարգով ստացված գումար:

Արդեն 2016թ-ի տարեկան հայտարարագիրը ներկայացնելուց՝ 2017թ-ի փետրվարին Օհանյանը վաճառել է իր «MERCEDES-BENZ G500» մակնիշի ավտոմեքենան 20 մլն դրամով: 2016թ-ի տարեկան հայտարարագրում Օհանյանը դարձյալ նվիրատվության կամ օգնության կարգով գումար է ստացել՝ 20 հազար դոլարի չափով:

2018թ-ի փետրվարին Օհանյանը էթիկայի հանձնաժողով է ներկայացրել իր 2017թ-ի տարեկան հայտարարագիրը, որից պարզ է դառնում, որ նա դարձյալ նվիրատվության կամ օգնության կարգով գումար է ստացել՝ 22 հազար դոլար:

2019թ-ի փետրվարի 7-ին Օհանյանը էթիկայի հանձնաժողով է ներկայացրել իր 2018թ-ի տարեկան հայտարարագիրը: Ըստ դրա՝ Օհանյանը տարեսկզբում ունեցել է 110 հազար դոլար, 75 մլն դրամ և 85 հազար եվրո, իսկ տարեվերջում այն դարձել է 73 մլն դրամ, 105 հազար դոլար և 85 հազար եվրո:

2018թ-ի ընթացքում փաստորեն դատավորն էլ նվիրատվություն չի ստացել: Նա ունեցել է 10 մլն 527 հազար 794 դրամի չափով եկամուտ, որից 6 մլն 178 հազար 794 դրամը գոյացել է աշխատավարձից, 1 մլն 620 հազար դրամը գոյացել է վարձակալության դիմաց ստացված վճարներից, իսկ 2 մլն 729 հազար դրմաը գոյացել է ստացված փոխառություններից:

Դատավորի կինը՝ Արմինե Օհանյանը, իր ունեցվածքով զիջում է ամուսնուն: Նա 2019թ-ի փետրվարին ամուսնու հետ միասին ներկայացրել է իր 2018թ-ի տարեկան հայտարարագիրը: Օհանյանը տարեսկզբում ունեցել է 25 մլն դրամ, 40 հազար դոլար և 10 հազար եվրո, որը տարեվերջում նույնչափ էլ մնացել է:

Օհանյանը 2018թ-ին ունեցել է 216 հազար դրամի չափով եկամուտ, որի համար, որպես եկամտի աղբյուր նշված է «այլ եկամուտներ»: