ՀՀ երկրորդ նախագահ Ռոբերտ Քոչարյանի պաշտպաններն, ի նշան բողոքի, չեն մասնակցի հունիսի 25-ին ժամը 16։00-ին կայանալիք ՀՀ Վերաքննիչ քրեական դատարանի նիստին:

Դատարանը պետք է հրապարակի ՀՀ Գլխավոր դատախազության կողմից բողոքարկված ՀՀ երկրորդ նախագահ Ռոբերտ Քոչարյանի նկատմամբ ընտրված խափանման միջոց կալանավորման որոշումը փոփոխելու և Սահմանադրական դատարան դիմելու որոշումը կասեցնելու վերաբերյալ Երևան քաղաքի ընդհանուր իրավասության դատարանի որոշման վերաբերյալ վճիռը։

ՀՀ երկրորդ նախագահ Ռոբերտ Քոչարյանը ևս չի մասնակցի նիստին:

«Հաշվի առնելով, որ Վերաքննիչ քրեական դատարանը թույլ չի տվել ՀՀ երկրորդ նախագահ Ռոբերտ Քոչարյանի պաշտպաններին ներկայացնել իրենց դիրքորոշումները և, կոպտորեն ոտնահարելով մրցակցային դատավարության սկզբունքը, հեռացել է խորհրդակցական սենյակ՝ դատական ակտ կայացնելու, հայտարարում ենք, որ ո՛չ նախագահ Քոչարյանը, ո՛չ Պաշտպանական խմբի անդամները, ի նշան բողոքի, չեն մասնակցելու այսօր կայանալիք նիստին», - ասվում է ՀՀ երկրորդ նախագահի պաշտպանական խմբի հայտարարության մեջ: