Հուլիսի 12-ից ի վեր Արարատի մարզի Տափերական գյուղի բնակիչներից շատերը խմելու ջուր չունեն։ Քանի որ ջրամատակարարումը հաճախ է գրաֆիկի խախտումներով իրականացնում, գյուղացիները մեծ փոսեր են փորել, բետոնապատել, ջրի խողովակներին պոմպեր են միացրել ջուր պահեստավորելու համար։ Ու քանի որ տասն օրից ավելի ջուր չի եղել, կամ էլ մի քանի րոպե կաթկթացել է, ջրհորներն էլ դատարկվել են։

«11 օր առանց ջուր ենք եղել։ Ստիպված կանեստրով ջուր եմ առել, որ գոնե երեխաների մարմինը էս 42 աստիճան շոգին հաճախ շփեմ ջրով։ Էլ չեմ խոսում կուտակված լվացքի ու այլ խնդիրների մասին»,- բողոքել է բնակչուհիներից մեկը։ Գրում է Պանորամա-ն։

Մարդիկ դաշտ են գնում, հոգնած գալիս են, լողանալու հնարավորություն չկա, հագուստը լվանալու ճար չկա, պահածոյացման շրջանն է, պտուղն ու հատապտուղը ճյուղերի վրա չորանում են, ջուր չկա, որ լվանան, կոմպոտ սարքեն։ Բնակիչներն ասում են, որ օրեր շարունակ զանգարահում են 1-85 հեռախոսահամարին, ի պատասխան ասում են՝ օպերատորները զբաղված են։

Բնակիչների բողոքը փոխանցվել է «Վեոլիա Ջուր» ընկերությանը։

«Արարատի մարզի Տափերական գյուղին «Վեոլիա Ջուր» ՓԲԸ-ի կողմից ջուր մատակարարվում է համաձայն գրաֆիկի: Նաև հարկ ենք համարում նշել, որ Տափերական գյուղի ներքին ցանցում կարգավորումներն իրականացվում են համայնքապետարանի աշխատակցի կողմից, և հետևաբար որևէ հատվածում ջրամատակարարման խնդրի կարգավորման համար հարկավոր է դիմել համայնքապետարանին», - նշել են Վեոլիա ջուր ընկերությունից։

Ընկերության հավաստիացումից հետո էլ բնակիչները ասել են, որ ջուր չունեն։