Ասկերանի շրջանի Դաշուշեն համայնքը հավակնում է դառնալ զբոսաշրջային վայր ինչպես մեր հայրենակիցների, այնպես էլ օտարերկրացիների համար: Այս մասին ասել է Դաշուշեն համայնքի ղեկավար Ռուդիկ Ասլանյանը: Գրում է «Արցախպրես»-ը։

Նրա խոսքով՝ համայնքում տեղադրված 50 մետր բարձրությամբ լուսատու խաչը տեսնելու համար շատերն են այցելում համայնք:

«Վերջին տարիներին նկատելի է այցելուների զգալի աճ, ինչը ողջունելի է: Հովանավորչական միջոցներով վերջերս վերանորոգվել է գյուղի եկեղեցին, որը ևս հետաքրքրություն է առաջացնում մարդկանց մոտ: Չնայած գյուղը փոքր է և ունի 137 բնակիչ, սակայն արտահոսք գրեթե չկա: Դաշուշենը հարակից է Ստեփանակերտին, հենց այդ պատճառով էլ մարդիկ մշտապես բնակվում են գյուղում»,- ավելացրել է Ռ. Ասլանյանը:

Համայնքի ղեկավարը նշել է, որ գյուղում առկա է շուրջ 33 տնտեսություն: Մարդիկ հիմնականում զբաղվում են անասնապահությամբ և բանջարանաբոստանային կուլտուրաների մշակմամբ: Վերջին տարիներին բնակիչներն ակտիվորեն զբաղվում են ջերմոցային մշակաբույսերի աճեցմամբ, որը, ըստ Ռ. Ասլանյանի, հնարավորություն է տալիս ոչ միայն սպառելու իրենց իսկ արտադրանքը, այլև գյուղմթերքը վաճառելու շուկայում: