Այսօր հայ ազատամարտիկ, Արցախի հերոս Պետրոս Ղևոնդյանի` Պետոյի ծննդյան օրն է: Նա այսօր կդառնար 56 տարեկան։

Ղևոնդյանը ծնվել է 1964թ-ի հունվարի 30-ին Պռոշյան գյուղում: Եղել է Շուշի առանձնակի գումարտակի հրամանատարի տեղակալը, Պռոշյանի կամավորական ջոկատի փոխհրամանատարը։ Իր հրամանատարությամբ գործող գումարտակի հետ նա մասնակցել է Շահումյանի, Մարտակերտի, Մարտունու և Հադրութի շրջանների տասնյակ բնակավայրերի ազատագրման մարտերին, Քելբաջարի թշնամական հենակետերի ոչնչացման ռազմագործողությանը՝ բազմիցս ցուցաբերելով խիզախություն ու հերոսություն։

Պետոն 1989թ-ից ակտիվ մասնակցել է Հայաստանի սահմանամերձ գյուղերի ինքնապաշտպանությանը և ազատագրական մարտերի Արցախի ամբողջ տարածքում: 1994թ-ի հունվարին Պետոն փոքր խմբով անցնում է Քարվաճառ` Օմարի լեռնանցք` տեղի պաշտպանական ջոկատներին օգնելու նպատակով: Նա մշակում և իր գումարտակով իրականացնում է լեռնանցքի ազատագրման ծրագիրը: 1992թ-ից Պետրոսը Շուշիի առանձնակի գումարտակի փոխհրամանատարն էր:

Նա մահացել է 1994թ-ի փետրվարի 14-ին՝ Քարվաճառում՝ վիրավոր զինակցին օգնություն ցույց տալու ժամանակ։ 2001թ-ին նրան շնորհվել է Արցախի հերոսի կոչում:

Պետոյի անունը կրում են Եղեգնուտի և հարազատ Պռոշյանի դպրոցները: 2007թ-ից ԵՊՀ ռադիոֆիզիկայի ֆակուլտետում, որտեղ սովորել է Պետրոսը, նրա անունը կրող լսարան է բացվել: 1994թ-ին լույս է տեսել Համլետ Գևորգյանի «Պետոն» գիրքը: