«Լեռնային Ղարաբաղի հարցը ինչպես Ադբեջանի, այնպես էլ մեր հարցն է»․ Թուրքիայի նախագահ
Թուրքիայի նախագահ Ռեջեփ Թայիփ Էրդողանը՝ Բաքու կատարած այցի ժամանակ հայտարարել է․
«Լեռնային Ղարաբաղի հարցը ինչպես Ադբեջանի, այնպես էլ մեր հարցն է։ Մեր ամենամեծ ցանկությունն է Լեռնային Ղարաբաղի հիմնախնդրի լուծումը Ադրբեջանի ինքնիշխանության և տարածքային ամբողջականության շրջանակներում»։
Էրդողանը նշել է, որ կշարունակեն աջակցել Ադրբեջանին «այս արդար պայքարում»:
«Ես ուզում եմ բաց ասել, որ Մինսկի խումբը, ցավոք, անկեղծ չէ այս հարցում, քանի որ կորսված է գրեթե 25 տարի: Ինչո՞ւ, ի՞նչ պատճառով որևէ արդյունք չկա: Բնականաբար, մենք պետք է խոսենք այս մասին»,- ասել է Էրդողանը։
Ալիևն էլ իր հեթին նշել է, որ քննարկել են ղարաբաղյան հակամարտության կարգավորման ուղիներն ու շնորհակալություն հայտնել «իր սիրելի եղբորը»` Թուրքիայի շարունակական աջակցության համար:
Ալիևն ասել է, թե «Հայաստանի ապակառուցողական դիրքորոշումը հիմնախնդրի կարգավորման հիմնական խոչընդոտն է և որ Հայաստանի ղեկավարության ծայրահեղ հակասական հայտարարությունները մեծ վնաս են հասցնում բանակցային գործընթացին, հավելելով, թե «հակամարտությունը պետք է լուծվի իրենց տարածքային ամբողջականության, երկրի ինքնիշխանության և սահմանների անձեռնմխելիության շրջանակներում»: