Կյանքից հեռացել է հուշարձանագետ Սամվել Կարապետյանը։ Լուրը «Ռադիոլուրի» հետ զրուցում հաստատել են ընտանիքի անդամները։ Գրում է Հանրային ռադիոն։

Սամվել Կարապետյանը 58 տարեկան էր։

Հայ անվանի հուշարձանագետ, պատմաբան, բանահավաք, Հայկական ճարտարապետությունն ուսումնասիրող հիմնադրամի (ՀՃՈւՀ) երևանյան գրասենյակի նախագահը ծնվել է 1961թ-ին հուլիսի 30-ին։ 1978թ-ին ավարտել է Երևանի Միսաք Մանուշյանի անվան թիվ 48 դպրոցը։

Սկսած 1975թ-ից ճամփորդել է Հայկական ԽՍՀ տարածքով բնությունը ուսումնասիրելու նպատակով, իսկ 1978թ-ից սկսած լուսանկարում, չափում և նկարագրում է հայկական հուշարձանները ամբողջ Պատմական Հայաստանի տարածքով։ Երեք տասնամյակի ընթացքում հետազոտում և ցուցակագրում է Պատմական Հայաստանի հայ ճարտարապետության հազարավոր նմուշներ։

Կարապետյանը հայտնի է որպես հարևան պետություններում հայկական հուշարձանների նկատմամբ վերաբերմունքի քննադատ։ Նա կարծում է, որ Թուրքիայի, Ադրբեջանի, Վրաստանի իշխանությունները նպատակաուղղված կերպով իրականացնում են հայկական հուշարձանների ոչնչացման քաղաքականություն։ Իր փաստերը 2007թ. ներկայացրել է ԱՄՆ կոնգրեսին և 2008թ. Մարդու իրավունքների Եվրոպական դատարանին։

Լուսանկարը՝ Սամվել Կարապետյանի ֆեյսբուքյան էջից