Թուրքիան ԼՂ հիմնախնդրի կարգավորման հարցում որևէ դերակատարում չի կարող ունենալ․ Զոհրաբ Մնացականյան
ԱԳ նախարար Զոհրաբ Մնացականյանը՝ պատասխանելով ԱԺ «Լուսավոր Հայաստան» խմբակցության պատգամավոր Տարոն Սիմոնյանի հարցին, նշել է․
«ԵԱՀԿ Մինսկի խմբի համանախագահների և Թուրքիայի ԱԳՆ-ի հանդիպման մեջ որևէ արտառոց բան չկա»։
Պատգամավորը նշել էր՝ 2 օր առաջ ԵԱՀԿ Մինսկի խմբի համանախագահները հանդիպել են Թուրքիայի ԱԳՆ-ի հետ և քննարկել որոշ հարցեր ԼՂ խնդրի կարգավորման հետ կապված.
«Արդյո՞ք մեր արտաքին գերատեսչությունը տեղյակ է եղել հանդիպման մասին, և եթե այո, ապա ինչի՞ մասին է խոսվել և ի՞նչ է քննարկվել»։
Նախարարը պատասխանել է, որ Մինսկի խմբի համանախագահները կարող են հանդիպել անդամ պետությունների և միջազգային կազմակերպությունների հետ։ Ըստ Մնացականյանի, նրանք կատարում են իրենց գործառույթը։
«Մինսկի խմբի համանախագահների հետ մենք աշխատում ենք ամբողջական վստահությամբ, և գիտենq՝ ինչ մոտեցմամբ են նրանք աշխատում։ Այդ առումով որևէ արտառոց բան չկա»,- ասաց Մնացականյանը, ապա հավելեց՝ սա համանախագանհերի և Թուրքիայի ԱԳՆ-ի առաջին հանդիպումը չէ։
Մնացականյանի խոսքով, այս հանդիպումն այնքանով էր տարբերվում, որ դրանից հետո Թուրքիայի ԱԳՆ-ն հանդես եկավ հայտարարությամբ, որը որևէ նոր միտք չէր պարունակում, ինչին ի պատասխան Հայաստանի արտգործնախարարությունը ևս հայտարարություն է տարածել։
«Հայաստանի և հայ ժողովրդի նկատմամբ ոչ բարեկամական քաղաքականությամբ, որը Լեռնային Ղարաբաղի հակամարտության համատեքստում արտահայտվում է նաև Ադրբեջանին ցուցաբերվող միակողմանի ռազմաքաղաքական աջակցությամբ, Թուրքիան չի կարող ԼՂ հիմնախնդրի խաղաղ կարգավորման հիմնահարցում որևէ դերակատարում ունենալ։ Սա մենք ասել ենք և կրկնում ենք։ Մենք շարունակում ենք աշխատել և ներկայացնել մեր մոտեցումներն ու նպատակը»,- մեկնաբանեց Մնացականյանը։
Արձագանքելով, Տարոն Սիմոնյանն ասաց, որ նախարարի պատասխանը շատ դիվանագիտական էր։ Պատգամավորն ասաց, որ Մնացականյանի հանգստությունը կկիսեր, եթե տարածաշրջանային այս իրադարձությունների բովում չլիներ հանդիպումը, և դա որպես արտաքին քաղաքականության ուղենիշ չնշմարվեր Թուրքիայի ԱԳՆ կողմից։
Հակադարձելով, Զոհրաբ Մնացականյանը նշեց, որ իր պատասխանը շատ հստակ էր, և վերահաստատեց իր խոսքը՝ Թուրքիան Լեռնային Ղարաբաղի հիմնախնդրի կարգավորման հարցում որևէ դերակատարում չի կարող ունենալ։