Օդեսայի Իցհակ Ռաբինի փողոցում գործող փոքր փռի սեփականատեր Վահրամ Ասլանյանը անվճար հաց է բաժանում կարիքավորներին։

Փուռը, որը նաև խանութ է, գտնվում է բանուկ վայրում։

«Ճգնաժամը շատ ցավոտ ազդեցություն ունեցավ իմ ձեռնարկության վրա, բայց հիմա բոլորի մոտ է այդպես։ Ես 5 փուռ ունեի, հիմա մեկն է մնացել։ Հիանալի հասկանում եմ, որ կան մարդիկ, որոնք մեծ կարիքի մեջ են, և որքան երկար տևի կարանտինը, այնքան շատ կաշխատեմ օգնել նրանց», - գրում է «Դումսկայա»-ն։

Ընդ որում՝ անվճար հացով դարակը դուրսն է տեղադրվել, քանի որ շատերն ամաչում են խանութ մտնել։ Ըստ Ասլանյանի՝ իր փուռն արդեն վաղուց է վնասով աշխատում, բայց որոշել է՝ քանի ալյուրի պաշար ունի շարունակել բարի գործը։

«Չմտածեք, որ սա երեկվա կամ չորացած հաց է, ամեն ինչ թարմ է՝ տաք-տաք»,- ասել է նա։