Արտակարգ դրության պայմաններում Մասիսի բժիշկները երեխայի ծնունդը տանն են ընդունել
Մայիսի 5-ի լուսադեմին Մասիսի բժշկական կենտրոնի շտապօգնության բրիգադը ստիպված է եղել երեխայի ծնունդը տանն ընդունել՝ արտակարգ պայմաններում։ Ծննդաբերությունը բարդ էր և վաղաժամ, ասվում է բուժկենտրոնի ֆեյսբուքյան էջում։
«Այնթապի նշված հասցեով կանչի մեկնելով՝ բժիշկները հասկացել են, որ կանչը սովորական չէ, այլ` արտակարգ: Կնոջ մոտ արդեն սկսված էր ծննդաբերական գործունեությունը և գտնվում էր ակտիվ փուլում: Շտապօգնության բժիշկ` Աշոտ Առաքելյանը, բուժքույր` Յաննա Գաբրիելյանն առանց հապաղելու սկսել են ընդունել ծնունդը:
Ծննդաբերությունը բարդ էր, վաղաժամ, առաջադրությունը` տոտիկային, ուստի ծննդօգնությանը միացել է նաև մյուս բժիշկը` Դավիթը Գալստյանը, ով մասնագիտությամբ մանկաբարձ-գինեկոլոգ է:
Ծնվել է հրաշք աղջնակ։ Բժիշկ Առաքելյանի կողմից կատարվել են ռեանիմացիոն գործողություններ, երեխայի և մոր վիճակը կայունացնելուց հետո իրականացվել է հոսպիտալացում»,- ասվում է գրառման մեջ:
Հիվանդանոցում թե մոր, թե պտղի վիճակը գնահատվել է բավարար: