Հայ-ադրբեջանական սահմանին իրավիճակի սրման հարցով ՀԱՊԿ արտահերթ նիստն անորոշ ժամանակով հետաձգվել է
Հավաքական անվտանգության պայմանագրի կազմակերպության (ՀԱՊԿ) մշտական խորհրդի արտահերթ նիստը, որը պետք է կայանար հուլիսի 13-ին կազմակերպության գլխավոր քարտուղար Ստանիսլավ Զասի նախաձեռնությամբ, անորոշ ժամանակով հետաձգվել է: Այդ մասին հայտնում է «Ազատություն» ռադիոկայանը՝ ՀԱՊԿ մամուլի քարտուղար Վլադիմիր Զայնետդինովին հղումով։
Ըստ խոսնակի՝ նիստը հետաձգվել է կողմերի միջև խորհրդակցություններ անցկացնելու պատճառով, ինչպես նաև պետք է հստակեցվի, թե ի՞նչ ձևաչափով պետք է կայանա քննարկումը։
Զայնետդինովը հրաժարվել է ասել, թե ու՞մ նախաձեռնությամբ է նիստը հետաձգվել։
Հիշեցնենք, որ ավելի վաղ ՀԱՊԿ-ից հայտնել էին, որ հայ-ադրբեջանական սահմանին իրավիճակի սրման կապակցությամբ, որը սկսվել է այս տարվա հուլիսի 12-ի Տավուշի ուղղությամբ բախումներով՝ ՀԱՊԿ գլխավոր քարտուղար Ստանիսլավ Զասը հուլիսի 13-ին նախաձեռնել է ՀԱՊԿ մշտական խորհրդի արտակարգ նիստ: