Մեղադրանք է առաջադրվել ՃՈ 15 աշխատակցի, այդ թվում նաև պաշտոնյաների
Բացահայտվել են վարորդական վկայականներ տրամադրելու դիմաց կաշառք ստանալու, պաշտոնեական լիազորությունները չարաշահելու, պաշտոնեական կեղծիք կատարելու, ինչպես նաև քաղաքացիների կողմից կաշառք տալու, կաշառք ստանալուն օժանդակելու և կաշառքի միջնորդության դեպքեր։ Այս մասին տեղեկացնում է Հատուկ քննչական ծառայությունը։
Մեղադրանք է առաջադրվել 15 անձի, այդ թվում` ՀՀ ոստիկանության «Ճանապարհային ոստիկանություն» ծառայության Վանաձորի հաշվառման-քննական բաժանմունքի տեսուչ Ա. Գրիգորյանին:
2020թ-ի փետրվարին ՃՈ տեսուչ Ա. Գրիգորյանը պայմանավորվել է իր մտերիմ, Գյումրիի բնակիչ Ս. Գրիգորյանի հետ` կաշառքի դիմաց քաղաքացիներին վարորդական վկայականներ տրամադրելու համար իրեն օժանդակելու հարցում: Շիրակի մարզի մի խումբ բնակիչներ անձամբ կամ միջնորդավորված, այդ թվում` Անիի ավտոդպրոցի տնօրեն Դ. Դարբինյանի միջոցով, 2020թ-ի փետրվար-մայիսին, կաշառքի դիմաց վարորդական վկայական ստանալու համար դիմել են Ս. Գրիգորյանին, ով նրանցից ստացել է ընդհանուր 1,920,000 դրամ, որից 1,020,000 դրամը փոխանցել է ՃՈ տեսուչ Ա. Գրիգորյանին:
Այսպիսով, Ա. Գրիգորյանի գործողությունների հետևանքով, ավտոմեքենա վարելու տեսական գիտելիքներ և գործնական հմտություններ չունեցող անձինք կաշառքի դիմաց ստացել են B, B, C կարգերի վարորդական վկայականներ:
Վերը նշված հանցավոր արարքների կատարման համար ՃՈ տեսուչ Ա. Գրիգորյանին մեղադրանք է առաջադրվել ՔՕ 308-րդ հոդվածի 1-ին մասով (Պաշտոնատար անձի կողմից իր պաշտոնեական դիրքը ծառայության շահերին հակառակ օգտագործելը, պատժվում է տուգանքով կամ մինչև 4 տարի ազատազրկմամբ), 311-րդ հոդվածի 2-րդ մասով (Պաշտոնատար անձի կողմից կաշառք ստանալը, պատժվում է ազատազրկմամբ` 3-7 տարի ժամկետով) և 314-րդ հոդվածի 1-ին մասով (պաշտոնական փաստաթղթերում ակնհայտ կեղծ տեղեկություններ կամ գրառումներ մտցնելը, պատժվում է տուգանքով կամ մինչև 3 տարի ազատզրկմամբ): Նրա նկատմամբ որպես խափանման միջոց է ընտրվել կալանավորումը:
Ս. Գրիգորյանին մեղադրանք է առաջադրվել ՔՕ 5 հոդվածով՝ կաշառք ստանալու, պաշտոնեական դիրքը ծառայության շահերին հակառակ օգտագործելու, պաշտոնական փաստաթղթերում ակնհայտ կեղծ տեղեկություններ մտցնելու, խարդախության համար։
Կաշառքի միջնորդության, կաշառք տալու, պաշտոնեական կեղծիք կատարելուն օժանդակելու, ինչպես նաև կաշառք տալու միջնորդության և կաշառք տալու փորձի համար ևս 13 անձի մեղադրանք է առաջադրվել ՔՕ տարբեր հոդվածներվ։