Շատ մեծ է հավանականությունը, որ վաղը մայիսի 1-ին ձեր կողմից առաջադրված թեկնածուն կընտրվի ՀՀ վարչապետ. Նիկոլ Փաշինյան
Հանրապետության հրապարակում ընթացող հանրահավաքը ավարտվել է։ Ելք խմբակցության ղեկավար, վարչապետի միակ թեկնածու Նիկոլ Փաշինյանը հանրահավաքի ժամանակ այսպես խոսեց․
«Չափազանցրած չենք լինի, եթե ասենք, որ աշխարհի ուշադրությունը կենտրոնացած է Հայաստանի ու նրա մայրաքաղաք Երևանի վրա, կարծես թե, վաղը այստեղ տեղի է ունենալու ֆուտբոլի աշխարհի առաջնության եզրափակիչը»։
Նա նշեց նաև, որ Ազգային ժողովի 4 խմբակցություններից 3-ը հայտարարել են, որ պաշտպանելու են իր թեկնածությունը, իսկ Հանրապետական մեծամասնությունը հայտարարել է, թե չի խոչընդոտելու այդ ընտրությանը։
«Շատ մեծ է հավանականությունը, որ վաղը ձեր կողմից առաջադրված թեկնածուն կընտրվի Հայաստանի վարչապետ։ Մինչև հիմա ընթացքի մեջ մեզ թվում էր, թե հենց սա է լինելու վերջին շրջանի քաղաքական գործընթացի ամենակարևոր իրադարձությունը։ Իրականում, սակայն, այսօր, հիմա կարելի է արձանագրել, որ ամենակարևոր իրադարձությունը տեղի է ունեցել դրանից առաջ, օրեր առաջ, երբ մեզ ակնհայտ էր, որ ՀՀ-ում կա ժողովուրդ, որը ոտքի է կանգնել», - հայտարարեց Նիկոլ Փաշինյանը։
Նա տեղեկացրեց, որ վաղը Հանրապետության հրապարակում պետք է տեղի ունենա հսկակայան տոնախմբություն։
«Հայ ժողովուրդը պետք է տոնի իր սեփական հաղթանակը, իր անշրջելի հաղթանակը։ Չգնալ որևէ ուրիշ տեղ, որևէ փողոց չփակել, բողոքի որևէ տրամադրություն չունենալ, ժամը 11-ին հավաքվել Հանրապետության հրապարակում ու տոնել սեփական հաղթանակը։ ՀՀ-ում դեռ կփոխվեն, դեռ իրար հետևից կգան և կգնան վարչապետեր, կառավարություններ, ԱԺ-ներ, նախագահներ, նախարարներ ու պատգամավորներ, բայց ՀՀ-ում չի փոխվելու ամենակարևորն ու հիմնականը՝ «Մենք ենք տերը մեր երկրի»,-վանկարկելով հայտնեց Նիկոլ Փաշինյանը։
«