Այսօր վաղ առավոտից ժամը 08։00-ից սկսած ցուցարարները փորձում են փակել Երևանի Մաշտոց-Թումանյան, Մաշտոց-Ամիրյան խաչմերուկները։

Մաշտոց-Ամիրյան խաչմերուկում մի կին նստեց փողոցի մեջտեղում՝ փակելով ճանապարհը, ոստիկանները շրջապատեցին նրան, վիճաբանություն սկսվեց քաղաքացիների և ոստիկանների միջև։

Նկատենք, որ Մաշտոցի պողոտայի երկայնքով շատ ոստիկաններ կան և նրանք փորձում են անմիջապես բացել փակվող փողոցները։

Առավոտից ցուցարարները Փարաքարի հատվածում փակել են նաև օդանավակայան տանող ճանապարհը։ Ճանապարհի փակումը մի քանի քաղաքացիների դժգոհությունը հարուցեց։ Այստեղ ևս ոստիկանական ուժեր կան կուտակված, նրանք փորձում են իրավիճակը հանդարտեցնել և չեն միջամտում ցուցարարների գործողություններին։

Փակ է նաև Էջմիածնից Երևան եկող ճանապարհը։

Նշենք, որ վարչապետի պաշտոնում առաջադրված միակ թեկնածու, Հայաստանի երրորդ նախագահ Սերժ Սարգսյանի և Հանրապետական կուսակցության հետագա իշխանավարման դեմ պայքարը գլխավորող ընդդիմադիր «Ելք» խմբակցության ղեկավար Նիկոլ Փաշինյանը երեկ Ազգային ժողովում չստացավ բավարար թվով ձայներ․ նրա օգտին քվեարկեց 45, դեմ՝ 56 պատգամավոր:

Քվեարկությունից հետո Փաշինյանը Երևանի Հանրապետության հրապարակում անցկացվող բազմամարդ հանրահավաքում կոչ արեց առավոտից վերսկսել քաղաքացիական անհնազանդության ակցիաները: