ՀՀ պաշտպանության նախկին նախարար Սեյրան Օհանյանը անդրադառնալով Հայաստանում վերջին օրերի ներքաղաքական իրադարձություններին, նշել է.

«Ճիշտ կշռադատող մարդիկ միշտ ասում են, որ նորօրյա պատմության ընթացքում մեր պետության կայացման բնականոն հունը մի քանի անգամ խաթարվել է. ընտրությունների միջոցով, ճիշտ գնահատականներ չտալու միջոցով, սահմանադրական բարեփոխումների ժամանակ, և ամենավերջին այդպիսի ոչ դրական քայլը 2017թ. ԱԺ ընտրություններն էին:

Դա կարծես թե վերջակետ դրեց բոլոր այն բացասական երևույթներին, որ կային: Իհարկե, փորձեր արվել են գնալ ժողովրդավարության, բայց այս խորհրդարանական ընտրությունները, ի վերջո, ցույց տվեցին, որ տարիների այդ բնականոն հունի խաթարման գագաթնակետին հասցրինք:

Նիկոլ Փաշինյանը պետք է լինի ՀՀ վարչապետ: Դրանում որևէ կասկած չի կարող լինել, որովհետև ինքը վաստակել է այդ իրավունքը` իր թիմի հետ միասին»: