Ադրբեջանում ամաչում են, որ տարածաշրջանի միակ բռնապետն իրենց ղեկավարն է, Կոնգրեսի Հելսինկյան կոմիտեում կայացած լսումների ընթացքում հայտարարել է ադրբեջանցի լրագրող, «Մեյդան» հեռուստաընկերության տնօրեն Էմին Միլլին.

«Մենք ամաչում ենք, որ այսօր Կովկասում մենք միակ երկիրն ենք, որը չի կարողացել ձերբազատվել հանցավոր բռնապետից, ով զավթել է իշխանությունը»: Փոխանցում է 168․am-ը։

Ըստ «Ամերիկայի ձայնի»՝ Հայաստանի «թավշյա հեղափոխությունը» հայերին աննախադեպ թռիչք ապահովեց՝ թողնելով Ադրբեջանը բռնապետությունների շարքում, որտեղ ավանդական են ընտրակեղծարարությունները, ընդդիմադիրների խոշտանգումներն ու լրագրողների նկատմամբ ճնշումները: Վերլուծաբան Օդրի Ալսթադի խոսքով, այդ ամենն Ադրբեջանում արվում է թաքուն, իսկ արտաքնապես այլ պատկեր են ներկայացնում.

«Ադրբեջանում մենք տեսնում ենք արտաքնապես ժողովրդավարություն, որը չունի բովանդակություն: Ռեժիմն օգտագործում է ժողովրդավարություն եզրույթը, սակայն, իրականում, ստեղծել է իր կատարյալ վերահսկողության տակ գտնվող համակարգ: Իրականում, սա ժողովրդավարության հակառակն է»:

Ավելին, լսումների մասնակիցները նշում են բազմաթիվ հետաքննություններ, որոնք վկայում են Ադրբեջանի ղեկավարության կողմից արտերկրի քաղաքական գործիչներին, փորձագետներին և լրագրողներին կոռումպացնելու փաստերի մասին:

«Կարծում եմ ժամանակն է, որպեսզի Միացյալ Նահանգների Կոնգրեսը հատուկ հետաքննություն նախաձեռնի՝ պարզելու համար, թե արդյոք Ալիևի վարչակարգը կոռումպացնում է ԱՄՆ-ում քաղաքական գործիչների, լրագրողների կամ փորձագետների»: