Եվրամիությունը ևս մեկ անգամ հաստատել է, որ դեռ պատրաստ չէ իր կազմի մեջ ընդունել Թուրքիային։ Նշենք, որ Թուրքիան արդեն մի քանի տասնամյակ փորձում է ԵՄ անդամ դառնալ։

Եվրոպայի հանձնաժողովի բարձրաստիճան ներկայացուցիչներից մեկը, ում անունը չի հրապարակվում, ռուսական «Известия» թերթին տված հարցազրույցում մասնավորապես ասել է.

«Եվրամիությունը պատրաստ չէ առաջիկա 10-15 տարվա ընթացքում Թուրքիային ընդունել իր կազմի մեջ»։

ԵՄ ներկայացուցիչը նշել է, որ Թուրքիան թե տնտեսական ցուցանիշներով, թե ժողովրդավարական արժեքների տեսանկյունից դեռևս չի համապատասխանում ԵՄ չափանիշներին․

«Վիճակը չի փոխվել։ Անկարան առաջիկա 10-15 տարվա ընթացքում ԵՄ անդամ դառնալու հնարավորություն չի ունենա։ Եվ դրա պատճառը միայն կուտակված քաղաքական խնդիրները չեն։ Բայց պետք է նաև հաշվի առնել, որ առաջիկայում ոչ մի երկիր չի մտնի Եվրամիության կազմի մեջ, քանի որ սկզբունքորեն ընդլայնում չի ծրագրվում»։

Եվրոպական խորհրդարանի՝ ԵՄ-Թուրքիա հարաբերությունների գծով պատասխանատու կոմիտեի անդամ Նադյա Հիրշը ևս հաստատել է այս տեղեկությունը։

«Մենք Թուրքիայի ԵՄ անդամակցությանն ուղղված բաց բանակցություններ ենք վարում, սակայն այդ երկրում շարունակվող արտակարգ դրության ռեժիմը, մարդու իրավունքների ոտնահարումները, մամուլի ազատության սահմանափակումները, իշխանությունների տարանջատման սկզբունքի ոտնահարումը ցույց են տալիս, որ Թուրքիայի ԵՄ անդամակցությունն այս պահին անհնարին է», - նշել է Հիրշը։