Ռուսաստանի և Վրաստանի ներկայացուցիչները երեկ Պրահայում կայացած հանդիպման ժամանակ համաձայնություն են ձեռք բերել, ըստ որի՝ Աբխազիայի և Հարավային Օսիայի տարածքներում բեռների մաքսային վերահսկողության համար պետք է ձևավորվի եռակողմ հանձնաժողով` բաղկացած՝ Վրաստանի, Ռուսաստանի և շվեյցարական SGS ընկերության ներկայացուցիչներից:

Այս մասին Ֆեյսբուքում գրառում է կատարել Հայաստանի փոխվարչապետ Տիգրան Ավինյանը՝ այդ փաստը որակելով «ևս մեկ դրական տեղաշարժ տնտեսության և տրանսպորտի ոլորտների համար»:

«Համաձայնագրի իրականացվելու պարագայում մենք կունենանք բեռնափոխադրման այլընտրանքային ճանապարհներ՝ այն դեպքերում, երբ Վերին Լարսի ավտոճանապարհը փակ լինի։ Համաձայնագրի իրականացման մասին ենք նաև զրուցել ՌԴ նախագահ Վլադիմիր Պուտինի հետ՝ մայիսի 14-ին Սոչիում կայացած հանդիպման ժամանակ։ Մենք բարձր ենք գնահատում կողմերի պատրաստակամությունն ու ջանքերը մեզ համար չափազանց կարևոր այս պայմանագրի իրականացման ուղղությամբ», - շեշտում է Ավինյանը:

Հիշեցնենք, որ Ռուսաստանի հետ հարաբերությունների գծով Վրաստանի վարչապետի հատուկ բանագնաց Զուրաբ Աբաշիձեն ՌԴ արտաքին գործերի փոխնախարար Գրիգորի Կարասինի հետ հանդիպումից առաջ հայտարարել էր, որ պաշտոնական Թբիլիսին պատրաստ է Ռուսաստանից դեպի Վրաստան և Հայաստան տանող «առևտրային միջանցքների» բացմանը: