Լա Մալբեում ընթացող G7 գագաթաժողովում երկրների ղեկավարները որոշել են 3,8 միլիարդ կանադական դոլար (ավելի քան 2,9 միլիարդ դոլար) ուղղել ճգնաժամային և աղքատ երկրներում կանանց որակյալ կրթություն ստանալու հնարավորությունները բարձրացնելու տարբեր ծրագրերին: Այս մասին ասվում է շաբաթ Կանադայի վարչապետ Ջասթին Թրյուդոյի մամուլի ծառայության տարածած հայտարարության մեջ։ Փոխանցում է ՏԱՍՍ-ը:

«Կանադան, ԵՄ երկրները, Գերմանիան, Ճապոնիան, Միացյալ Թագավորությունը և Համաշխարհային բանկը այսօր հայտարարում են գրեթե 3.8 մլրդ կանադական դոլարների ներդրման մասին, որը նախատեսված է ողջ աշխարհում որակյալ կրթության մատչելիության բարձրացման եւ խոչընդոտները վերացնելու համար հիմք դնելուն», - նշվում է փաստաթղթում:

Դրանում ընդգծվում է, որ սա խոշորագույն ներդրում է ճգնաժամային և հակամարտող երկրներում կանանց և աղջիկների կրթության ոլորտում:

«Գենդերային հավասարությունը մարդու գլխավոր իրավունքներից է և G7-ում Կանադայի նախագահության ընթացքում կարևոր առաջնահերթություն է եղել», - ասվում է հայտարարության մեջ: