Վերաքննիչ քրեական դատարանի դահլիճից ազատ արձակվեցին «Նոր Հայաստան» հանրային փրկության ճակատի առաջնորդ Ժիրայր Սեֆիլյանը, քաղաքացիական ակտիվիստ Գևորգ Սաֆարյանը, Ներսես Պողոսյանը, Սասունիկ Կիրակոսյանը, Գալուստ Գրիգորյանը և Հրայր Թոփչյանը:

Ավելի վաղ՝ վերաքննիչ բողոքի քննությունից հետո, մեղադրող Պետրոս Պետրոսյանը մի շարք մեղմացուցիչ հանգամանքներ էր նշել՝ միջնորդելով Ժիրայր Սեֆիլյանին դատապարտել ազատազրկման 7 տարի ժամկետով, Գալուստ Գրիգորյանին 3.6-ի փոխարեն դատապարտել 3 տարի ազատազրկման, իսկ Գևորգ Սաֆարյանի նկատմամբ սահմանված պատիժը պայմանականորեն չկիրառել:

Նշենք, որ նախորդ երկու դատական նիստերին պաշտպաններն ամբաստանյալների խափանման միջոց կալանքը փոխելու վերաբերյալ միջնորդություններ էին ներկայացրել:

Ավելի վաղ ԱԺ «Ծառուկյան» դաշինք խմբակցության պատգամավորներ Նաիրա Զոհրաբյանը, Միքայել Մելքումյանը, Վահե Էնֆիաջյանը, Վարդան Բոստանջյանը, Իվետա Տոնոյանը, Շաքե Իսայանը, Վարդևան Գրիգորյանը, Արթուր Մանուկյանը, Լուիզա Սարգսյանը, Սերգեյ Բագրատյանը և «Ելք»-ից Ալեն Սիմոնյանը Ժիրայր Սեֆիլյանի խափանման միջոց կալանքը փոխելու համար անձնական երաշխավորություն էին ներկայացրել:

«Ելք»-ից Ալեն Սիմոնյանն ու Հայկ Կոնջորյանը նաև անձնական երաշխավորություն էին ներկայացրել Գևորգ Սաֆարյանին կալանքից ազատելու համար, իսկ Լենա Նազարյանն ու Հրաչյա Հակոբյանը՝ ամբաստանյալ Ներսես Պողոսյանի համար:

Հիշեցնենք, որ Երևան քաղաքի ընդհանուր իրավասության դատարանը Ժիրայր Սեֆիլյանին դատապարտել էր 10 տարի 5 ամիս ժամկետով ազատազրկման, Գևորգ Սաֆարյանին՝ ընդհանուր 5 տարի 5 ամիս, Սասունիկ Կիրակոսյանը՝ 4 տարի 6 ամիս, Ներսես Պողոսյանը՝ 3 տարի 6 ամիս, Հրայր Թոփչյանը՝ 3, Գալուստ Գրիգորյանը՝ 3 տարի 5 ամիս, Հովհաննես Պետրոսյանը՝ 2 տարի ժամկետով ազատազրկման: Վերջինի պատժի կրման ժամկետն ավարտվել է, և մայիսի 31-ին նա ազատ է արձակվել քրեակատարողական հիմնարկից:

Ժիրայր Սեֆիլյանին մեղադրանք էր առաջադրվել ՀՀ ՔՕ-ի 35-225-րդ հոդվածի 1-ին մասի, 35-225-րդ հոդվածի 1-ին մասի, 35-219-րդ հոդվածի 3-րդ մասի 1-ին կետի հատկանիշներով, որոնցում ճանաչվեց մեղավոր:

Մեղադրական եզրակացության մեջ ասվում էր, որ Սեֆիլյանը, մի խումբ անձանց հետ նախնական համաձայնությամբ, 2015թ․-ի ապրիլի 24-ին Երևանում բռնություն գործադրելով, գույք ոչնչացնելով և վնասելով, ինչպես նաև իշխանության ներկայացուցչին զինված դիմադրություն ցույց տալով արտահայտված, հասարակական անվտանգությունը վտանգող զանգվածային անկարգություններ հրահրելու ուղղակի դիտավորությամբ, 2014թ․-ի մայիսից կատարել է դրա կազմակերպմանն ուղղված նախապատրաստական գործողություններ, բացի այդ՝ 2015թ․-ի նոյեմբերից մինչև 2016թ․-ի մայիսի 18-ը կազմակերպված խմբի կազմում ապօրինի կերպով ձեռք է բերել, պահել և փոխադրել հրազեն ու ռազմամթերք` նպատակ ունենալով զենքի գործադրմամբ, կյանքի համար վտանգավոր բռնություն գործադրելով զավթել և պահել ռազմավարական նշանակության շենքեր, շինություններ, սակայն, իր կամքից անկախ հանգամանքներով, ավարտին չի հասցվել:

Մյուս ամբաստանյալները՝ Սասունիկ Կիրակոսյանը, Ներսես Պողոսյանը, Հրայր Թոփչյանը, Գալուստ Գրիգորյանն ու Հովհաննես Պետրոսյանը մեղավոր էին ճանաչվել ՀՀ ՔՕ-ի 235-րդ հոդվածի 3-րդ մասով նախատեսված արարք կատարելու մեջ (ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը կազմակերպված խմբի կողմից):

Գևորգ Սաֆարյանը մեղավոր էր ճանաչվել ՀՀ ՔՕ-ի 35-225-րդ հոդվածի 1-ին մասով նախատեսված արարք կատարելու համար (զանգվածային անկարգությունների նախապատրաստություն):