Երևանի գլխավոր ճարտարապետն ազատվել է աշխատանքից
Երևանի գլխավոր ճարտարապետ Տիգրան Բարսեղյանն ազատվել է աշխատանքից: Համապատասխան որոշումը ստորագրել է Երևանի քաղաքապետի առաջին տեղակալ, քաղաքապետի պաշտոնակատար Կամո Արեյանը:
Որոշումը կայացվել է, հիմք ընդունելով Տ. Բարսեղյանի դիմումը և ղեկավարվելով «Երևան քաղաքում տեղական ինքնակառավարման մասին» օրենքի 48.1-րդ հոդվածի 1-ին մասով, «Հանրային ծառայության մասին» օրենքի 9-րդ հոդվածի 15-րդ մասով:
«1.Երևան քաղաքի գլխավոր ճարտարապետ Տիգրան Բարսեղյանին՝ 2018թ-ի սեպտեմբերի 17-ից ազատել զբաղեցրած պաշտոնից։
2.Հանձնարարել աշխատակազմի ֆինանսական վարչության պետին՝ կատարել վերջնահաշվարկ Հայաստանի Հանրապետության օրենսդրությամբ սահմանված կարգով», - ասվում է որոշման մեջ։
Նշենք, որ Տիգրան Բարսեղյանը Երևանի գլխավոր ճարտարապետի պաշտոնը զբաղեցնում էր 2013թ-ից։
Հետևի՛ր մեզ քեզ հարմար սոցիալական ցանցում