Դավիթ Տոնոյանի հավաստմամբ՝ եթե քաղաքական իրավիճակով պայմանավորված սահմանին լարվածություն լինի՝ Զինված ուժերն իրենց առաջադրանքը կկատարեն
ՀՀ պաշտպանության նախարար Դավիթ Տոնոյանը հավաստիացնում է, որ սահմանին իրավիճակը կայուն է։
«Վերջին օրերի համեմատ այսօր եղել է ամենացածր հրադադարի խախտման վիճակագրությունը»,- կառավարության նիստից հետո լրագրողների հետ զրույցում ասաց նախարարը։
Հարցին, թե վարչապետ Նիկոլ Փաշինյանը իրավիճակի կայունությունը կապում է Ադրբեջանի նախագահ Իլհամ Ալիևի հետ պայմանավորվածության հետ, արդյոք նախարարն է՞լ է այդ կարծիքին, Դավիթ Տոնոյանը պատասխանեց.
«Մենք ստացել ենք հրահանգ՝ չթիրախավորելու և պահպանելու հրադադարի ռեժիմը: Եվ դա մենք իրականացնում ենք»:
Լրագրողները նաև հետաքրքրվեցին՝ վարչապետը հայտարարել է հրաժարականի դիմում ներկայացնելու մասին, արդյոք դա չի ազդի սահմանային լարվածության վրա, պաշտպանության նախարարն ասաց, որ ինքն այդպես չի կարծում:
«Ամեն դեպքում, մենք այս պահին հրադադարը պահպանում ենք և, եթե քաղաքական իրավիճակով պայմանավորված լինի իրավիճակի փոփոխություն՝ Զինված ուժերն իրենց առաջադրանքը կկատարեն»,- հայտարարեց Դավիթ Տոնոյանը: