Դավիթ Խաժակյան. «Երևանի քաղաքապետն ավելի շատ տեղակալ ունի, քան վարչապետը»
Երևանի ավագանու արտահերթ նիստում «Լույս» խմբակցության ղեկավար Դավիթ Խաժակյանն իր ելույթում հայտարել է՝ հաստիքացուցակների չփոփոխումն օբյեկտիվ չէ։
«Կան հաստիքներ, որոնք այս պահին անհրաժեշտ է կրճատել»,- ասել է խմբակցության ղեկավար Խաժակյանը։
Նա ներկաներին կոչ արեց քաղաքապետի աշխատակազմը համեմատել վարչապետի աշխատակազմի հետ։
«Քաղաքապետն ունի մեկ առաջին տեղակալ, երեք տեղակալ, վարչապետն ունի երեք տեղակալ։ Հասկանալի է, որ ժամանակին գործել է բոլորովին այլ տրամաբանություն։ Այս թվին մենք գումարում ենք, որը հիմա հաստատում ենք, յոթ խորհրդական և հինգ օգնական։ Անցած մեկ ու կես տարում մենք համոզվեցինք, որ կային տեղակալներ ու խորհրդականներ, որոնք համակարգում էին կոնկրետ ոլորտներ՝ վարչությունների ոլորտները։ Ըստ էության, այդ համակարգումը, կառավարումը տեղի է ունենում միջնորդավորված։ Վարչության պետը որոշում կայացնող չէ, երբ խոսում է կարևոր խնդիրների մասին»,-ասել է Խաժակյանը՝ ընդգծելով, եթե պահպանվում են հաստիքները, ապա պահպանվում է նախորդ տրամաբանությունը։
Հիշեցնենք, որ այսօրվա նիստում ընդգրկված է հաստիքացուցակները, դրույքաչափերն ընդունելու մասին հարցը, ըստ հրապարակված նախագծի, որևէ փոփոխություն չի նախատեսվում։