Ըստ «Ժողովուրդ» թերթի՝ ԱՆ նախարարն ընկերների աշխատավարձերը կրկնակի բարձրացնելու լուրից հետո հետին ամսաթվով այլ աշխատակիցների աշխատավարձերի մասին հրաման է արձակել
«ՀՀ առողջապահության նախարարի ժամանակավոր պաշտոնակատար Արսեն Թորոսյանի հերթական «գլուխգործոցն» է երևան եկել:
«Ժողովուրդ» օրաթերթի նոյեմբերի 1-ի համարում անդրադարձ է եղել Նորքի ինֆեկցիոն կլինիկական հիվանդանոցի տնօրեն Մհեր Դավիդյանցի և իր տեղակալների աշխատավարձերի բարձրացման փաստին (այն 350.000-ից դարձել է 710.000), ինչը, ի դեպ, մեզ հետ զրույցում հաստատել էր հենց Դավիդյանցը: Ըստ որոշ տեղեկությունների' նախարարի ընկեր Դավիդյանցը խոսելուց անմիջապես հետո (օրաթերթի և Դավիդյանցի միջև զրույցը տեղի է ունեցել հոկտեմբերի 31-ին) աշխատավարձերի թեմայի մասին «զեկուցել է» Թորոսյանին, ինչից հետո, ըստ որոշ տեղեկությունների, Թորոսյանը հետին թվով՝ հոկտեմբերի 30-ին, հրաման է արձակել տնօրենների, տեղակալների և գլխավոր հաշվապահների աշխատավարձերի չափաբաժինների մասին:
Սակայն «Ժողովուրդ» օրաթերթին ԱՆ-ից փոխանցել են, որ նման բան չկա, անգամ տեխնիկապես դա հնարավոր չէ: Ի դեպ որոշ տեղեկությունների համաձայն՝ նախարարի ԺՊ-ն իր այս հրամանը էլեկտրոնային հասցեներով (մեյլերով) է ուղարկել հասցեատերերին: Եվ ամենաուշագրավն այն է, որ Թորոսյանը ուժը կորցրած է ճանաչել՝ հիմք ընդունելով վարչապետի 2018թ-ի հուլիսի 11-ի N 728-L որոշումը: Բայց այնքան են շտապել նախարարությունում, որ հրամանի մեջ շփոթել են՝ նշելով «հուլիսի 11»: Մինչդեռ վարչապետը ընդունել է N 728 - L որոշումը հունիսի 11-ին»,- գրում է թերթը: