Տաքսի-հավելվածները պետք է գործակցեն միայն լիցենզավորված տաքսիստների հետ
Մարդատար տաքսի ավտոմոբիլներով ուղևորափոխադրումների գործընթացի կանոնակարգման նախագծով առաջարկվում է կանոնակարգել էլեկտրոնային հարթակների միջոցով ուղևորների պատվերներ գրանցող և փոխանցող կազմակերպությունների գործունեությունը:
Հիմնավորման մեջ նշվում է, որ անհավասար պայմաններ են տաքսի ծառայություններ մատուցողների համար, ինչպես նաև այս ոլորտը դուրս է մնում վերահսկողությունից, քանի որ ցանկացած անձ կարող է միանալ ծրագրին և իրականացնել տաքսամոտորային փոխադրումներ՝ առանց հարկային պարտավորությունների կատարման և անվտանգության պահանջների ապահովման:
Առաջարկվում է, որ այդ կազմակերպությունները պայմանագրային հարաբերությունների մեջ մտնեն բացառապես լիցենզավորված տաքսի ծառայություն մատուցողների հետ, միաժամանակ վերահսկողություն իրականացնելու նպատակով լիազոր մարմնին տրամադրեն տվյալների բազան:
Նշենք, որ Հայաստանում էլեկտրոնային հարթակների միջոցով ուղևորների պատվերներ գրանցող և փոխանցող կազմակերպությունները երեքն են: