Արփինե Հովհաննիսյան. «Փաշինյանի հայտարարած աշխատավարձի բարձրացումը միֆ է»
ՀՀԿ նախընտրական ցուցակի երկրորդ համար Արփինե Հովհաննիսյանն, անդրադառնալով ՀՀ վարչապետի պաշտոնակատար Նիկոլ Փաշինյանի հայտարարությանը աշխատավարձերի բարձրացման մասին, հայտարարել է, որ իրականում դա միֆ է, որից հնարավոր է շահեն բացառապես բարձր աշխատավարձեր ստացողները: Այդ մասին նա հայտնել է իր ֆեյսբուքյան էջում:
Հովհաննիսյանը նշել է, որ ցածր աշխատավարձ ստացողների (շուրջ 300,000) եկամուտը չի ավելանա` դա «հերթական մանիպուլյացիան» է:
«Ինչու եմ ասում՝ հնարավոր է, որովհետև նախ`մի քանի օր առաջ վարչապետը ասաց, որ եկամտահարկի իջեցումից բարձրանալու են աշխատավարձերը, իսկ երեկ էլ, ինքն իրեն հակասելով, Վանաձորում հայտարարեց, որ այդ նույն բարեփոխման արդյունքում գործատուների հարկային բեռը կնվազի: Իհարկե լավ է, որ օրեր անց Փաշինյանը թե՛ իր և թե՛ հասարկության համար բացահայտեց այդ փոփոխության իրական էությունը: Իբր անապահովների հարցը լուծել էր, հիմա էլ խրախուսում է բարձր աշխատավարձը: Լավ, ասենք, հնարավո՞ր չէ, վարչապետի մակարդակով մի հարցի վերաբերյալ իրար հակասող տեղեկատվություն չհրապարակել»,- ասվում է գրառման մեջ:
Ավելի վաղ վարչապետի պաշտոնակատար Նիկոլ Փաշինյանն ասել էր.
«Հարջորդ քայլը եկամտահարկի համահարթեցումն է. 36 տոկոս և 28 տոկոս եկամտահարկերը կհամահարթեցվեն 23 տոկոսի: Սա աշխատանք է երկու ուղղությամբ. առաջինը՝ մենք ըստ էության խրախուսում ենք բարձր աշխատավարձերով նոր աշխատատեղերի ստեղծումը, և երկրորդ՝ մենք 50 մլրդ դրամ «ներարկում ենք» տնտեսության մեջ, ոչ թե հավաքագրում ենք պետական բյուջե՝ թողնելով այն մարդկանց մոտ՝ շրջանառության մեջ: Սա նշանակում է նաև աշխատավարձերի բարձրացում, շատ են ասում պետբյուջեով չի նախատեսվում աշխատավարձի բարձրացում. Մարդկանց եկամտահարկը նվազում է, սա նշանակում է, որ բարձրանում է աշխատավարձը»: