Սիրիայի քրդերն ամերիկացի զինվորականների հետ քաշվելը համարում են «դավաճանություն»
Սիրիայում գործող ընդդիմադիր քրդամետ «Սիրիայի դեմոկրատական ուժեր» խմբավորումից մեկնաբանել են ԱՄՆ իշխանությունների՝ Սիրիայից ամերիկացի զինվորականների դուրսբերման մասին որոշումը՝ այն անվանելով «դավաճանություն», գրում է Sputnik-ի թուրքական ծառայությունը՝ հղում անելով Sky News-ի արաբական ծառայությանը:
Աղբյուրը չի նշում իրենց հետ զրուցած խմբավորման ներկայացուցիչների անունները: Զինյալները նշել են, որ թուրքական ԶՈւ-ի հնարավոր նոր լայնամասշտաբ հարձակման վտանգի առկայության պայմաններում իրենց դաշնակից ԱՄՆ-ի հետ քաշվելը «հարված է թիկունքից»:
Նշվում է նաև, որ այժմ փաստացի մարտի դաշտում միայնակ մնացած քուրդ զինյալները, որոնց դիրքերը հիմնականում գտնվում են Եփրատ գետի արևելյան ափին, ամենայն հավանականությամբ, կմիավորվեն մեկ այլ քրդական զինված միավորման՝ YPG/PYD-ի հետ:
Հիշեցնենք, որ անցյալ շաբաթ Թուրքիայի նախագահ Ռեջեփ Թայիփ Էրդողանը հայտարարել է, որ երկրի ԶՈւ-ն հաշված օրեր անց ռազմական գործողություն կսկսի Սիրիայի տարածքում Եփրատ գետի աջ ափին տեղակայված քրդական ուժերի դեմ:
Ավելի վաղ Էրդողանը հայտարարել էր, որ եթե ամերիկյան կողմը չապահովի քրդական զինված ջոկատների դուրսբերումը Մանբիջից, թուրքական ԶՈւ-ն կանցնի մեծամասշտաբ ռազմական գործողությունների:
Դրանից հետո Պենտագոնի մամուլի քարտուղար Շոն Ռոբերտսոնն անընդունելի էր որակել Թուրքիայի ռազմական գործողությունների ծրագիրը Մանբիջում
Նախօրեին արդեն հայտնի է դարձել, որ թուրք զինվորականներն սկսել են հզորացնել Սիրիայի հետ սահմանին տեղակայված ստորաբաժանումները: