Կարմրուկի աննախադեպ տարածում է գրանցվել Ուկրաինայում
Ուկրաինայում արձանագրվել է 2018թ-ին աշխարհում կարմրուկի դեպքերի ամենամեծ աճը:
ՄԱԿ-ի փորձագետների համոզմամբ, ի շարս այլ հանգամանքների՝ բացասական դեր է կատարել պատվաստումների դեմ հանրային շարժումը, որն ազդեցություն է ապահովել Ուկրաինայի որոշ շրջաններում և ակտիվություն է դրսևորում հատկապես սոցիալական ցանցերում:
ՅՈւՆԻՍԵՖ-ը հայտարարել է, որ պատվաստումների դեմ շարժումը կարող է ամբողջությամբ վերացնել տասնամյակների ընթացքում բժիշկների կատարած աշխատանքի շնորհիվ ձեռք բերված նվաճումը, քանի որ կարմրուկը հեշտությամբ կանխվող հիվանդություն է, որը, սակայն, չբուժելու դեպքում կարող է մահացու լինել:
Առողջապահության համաշխարհային կազմակերպության տվյալներով, անցյալ տարի Ուկրաինայում կարմրուկով հիվանդացել է ավելի քան 35 հազար մարդ, ինչն աննախադեպ աճ է 2017թ-ին գրանցված 5 հազար դեպքերի համեմատությամբ:
Երկրորդ տեղում կարմրուկով հիվանդացության աճի առումով Սերբիան է: Կարմրուկի դեպքեր են արձանագրվել նաև նախկինում այդ հիվանդությունը հաղթահարած երկրներ համարվող Մոլդովայում, Չեռնոգորիայում և Ուզբեկստանում: