«Արամ Սիմոնյանի պաշտոնավարման մեջ լրջագույն խնդիրներ եմ տեսնում». Արայիկ Հարությունյան
Այսօր լրագրողների հետ զրույցի ընթացքում անդրադառնալով ԵՊՀ ռեկտոր Արամ Սիմոնյանի հնարավոր պաշտոնանկությանը ՀՀ ԿԳ նախարար Արայիկ Հարությունյանը հայտնել է․
«Այն դեգրադացիան, որ կա ԵՊՀ-ում, կարծում եմ՝ կհանգեցնի նրան, որ խորհուրդը գոնե այդ գործընթացները կշարունակի քննարկել։ Ես Արամ Սիմոնյանի պաշտոնավարման մեջ լրջագույն խնդիրներ եմ տեսնում»:
Հարցին, թե ի՞նչ նկատի ունի նախարարը լրջագույն խնդիրներ ասելով՝ Հարությունյանը պատասխանել է․
«ԵՊՀ-ի ներկայիս վիճակը տեսեք և կպատկերացնեք, թե ուր է գնում ԵՊՀ-ն: Համալսարանն ունեցել է ռազմավարական պլան, բայց այս իրադարձություններից դրդված ինչ-որ բարեփոխումների խմբեր են ստեղծում, ինչը ենթադրում է, որ այն ռազմավարական պլանը, որն ունեցել է, տարել է հետընթացի»:
Հիշեցնենք, որ փետրվարի 28-ին Երևանի պետական համալսարանի հոգաբարձուների խորհրդի նիստից հետո ԵՊՀ ռեկտոր Արամ Սիմոնյանը հայտարարել է, որ ինքնակամ հրաժարական չի տա իր պաշտոնից: