Երևանի ընդհանուր իրավասության դատարանի Կենտրոնի նստավայրում դատավոր Մեսրոպ Մակյանի նախագահությամբ ապրիլի 5-ին կայացած նիստում դատարանը որոշել է ԱԺ ԲՀԿ խմբկացության պատգամավոր, Գագիկ Ծառուկյանի թիկնազորի նախկին պետ Էդուարդ Բաբայանին դատապարտել 3 տարի 6 ամիս ազատազրկման:

Սակայն նրա պատիժը չի կիրառվի` համաներման ակտի համաձայն: Այս մասին հայտնել է Բաբայանի պաշտպաններից Արմեն Մելքոնյանը: Գրում է Factor.am-ը։

Նշենք, որ Էդուարդ Բաբայանն իրեն մեղավոր չի ճանաչում, իսկ տուժողը չնայած, որ առաջին օրերին պնդում էր, որ իրեն ծեծի է ենթարկել Բաբայանը, դատարանում հայտարարել է, որ նման դեպք տեղի չի ունեցել, ինքը վնասվածք է ստացել սայթաքելու հետևանքով: Նա մեղադրվում է 50-ամյա Վյաչեսլավ Հարությունովի առողջությանը դիտավորությամբ ծանր վնաս պատճառելու համար:

Հիշեցնենք, որ դեպքը տեղի էր ունեցել 2018թ-ին հուլիսի 2-ին: Բաբայանը կալանավորվել էր, ապա օգոստոսի 21-ին 20 մլն դրամ գրավի դիմաց ազատ արձակվել: