ԲՀԿ-ական պատգամավորն առաջարկել է արգելել «մերսման սրահները»
ԱԺ-ում «Մարդկանց թրաֆիքինգի և շահագործման ենթարկված անձանց նույնացման և աջակցության մասին» ՀՀ օրենքում փոփոխությունների նախագծի քննարկման ժամանակ «Բարգավաճ Հայաստան» խմբակցության պատգամավոր Սերգեյ Բագրատյանն առաջարկել է արգելել «մերսման սրահների» գործունեությունը:
Պատգամավորը նախագծի հիմնական զեկուցող աշխատանքի և սոցիալական հարցերի նախարարի տեղակալ Գեմաֆին Գասպարյանի ուշադրությունն է հրավիրել այդպիսի սրահներում մարդկանց թրաֆիքինգի ենթարկելու հնարավոր դեպքերի վրա:
«Ուզում եմ անդրադառնալ հանրապետությունում և հատկապես Երևանում գործող՝ այսպես կոչված մերսման սրահներում թրաֆիքինգի դրսևորումներին՝ սեռական շահագործմանն ու անկանոն աշխատանքային գրաֆիկին: Առաջարկում եմ, որ Ձեր կառույցն ուսումնասիրի այս երևույթը, և հնարավորինս արագ փակեք Երևանում գործող թրաֆիքինգի այդ կենտրոնները»,- ասել է պատգամավորը։
Նախարարի տեղակալը նշել է, որ թրաֆիքինգի զոհերի հետ կապված աջակցության գործընթացն իրականացնում է իրենց նախարարությունը, իսկ պաշտպանության գործընթացը՝ ոստիկանությունը։
«Մենք միշտ պատրաստ ենք աջակցել, իսկ քրեական գործեր հարուցելն ու վարույթ ընդունելն արդեն ոստիկանության տիրույթում է»,- ասել է Գասպարյանը։