Այսօր տեղի է ունեցել Գրքի երևանյան փառատոնի բացման արարողությունը
Այսօր Հայաստանի բարեգործական ընդհանուր միության շենքում տեղի ունեցավ Գրքի երևանյան փառատոնի բացման պաշտոնական արարողությունը։
Նոյեմբերի 22-24 ընկած ժամանակահատվածում Մելիք Ադամյան 2/2 հասցեում տեղի կունենան բազմաբնույթ իրադարձություններ, այդ թվում՝ շնորհանդեսներ, հանդիպում-քննարկումներ, ցուցահանդես-վաճառք, վարպետության դասեր, պանելային զրույցներ, համերգներ, կամփոփվեն այս տարվա գրական մրցույթի արդյունքները։
Փառատոնի ծրագրային իրադարձություններին զուգահեռ գործում է գրքի տոնավաճառը․ մասնակից հայկական հրատարակչությունները սահմանել են 20-40% զեղչի հնարավորություն (նկատենք, որ «Անտարես» հրատարակչությունը տաղավար չի ներկայացնում)։
Փառատոնի փակման արարողությունը տեղի կունենա նոյեմբերի 24-ին՝ 19։00-ին, որի ընթացքում կազդարարվեն նաեւ այս տարվա գրական մրցույթի հաղթողները։
Բոլոր իրադարձությունների մուտքն ազատ է։
Հիշեցնենք, որ գրքի երևանյան փառատոնն անցկացվում է 2017թ-ից։
Նպատակն է խթանել ընթերցանությունը, ժամանակակից գրականության նկատմամբ հետաքրքրությունը, գրող-գրական գործակալ-հրատարակիչ-ընթերցող շղթայի ամրապնդումը, նոր հրատարակությունների մասին տեղեկացնելը, նոր գրականության ստեղծմանը նպաստելը։