Ադրբեջանի գլխավոր դատախազությունը Ինտերպոլի գծով հետախուզում է հայտարարել «Հանուն արդարության և ժողովրդավարության Եվրոպայի հայկական ֆեդերացիայի»՝ Եվրոպայի Հայ դատի հանձնախմբի ղեկավար Կասպար Կարապետյանի նկատմամբ: Փոխանցում է «ազատություն»-ը։

«Կարապետյանը 2014-2018 թթ.-ին այցելել է Լեռնային Ղարաբաղ, որտեղ Ադրբեջանի ինքնիշխանության և տարածքային ամբողջականության դեմ կոչեր է հնչեցրել»:

«2018 թ․-ի փետրվարին Կարապետյանը ներգրավվել է որպես մեղադրյալ Ադրբեջանի քրեական օրենսգրքի մի քանի հոդվածներով՝ պետության դեմ ուղղված հրապարակային կոչերի և կազմակերպված խմբով Ադրբեջանի սահմանը հատելու մեջ: Որպես խափանման միջոց ընտրվել է կալանքը, և նրա նկատմամբ հայտարարվել է Ինտերպոլի գծով միջազգային հետախուզում»:

Եվրոպայի Հայ դատի հանձնախմբի գրասենյակը «Ազատության» հարցին ի պատասխան էժանագին և անհիմն լուրեր որակեց ադրբեջանական լրատվամիջոցների տվյալ հաղորդումը՝ պնդելով, որ դրանց տարածումը Հայաստանում ադրբեջանական իշխանության նպատակն է: Գրասենյակից խոստացան Կասպար Կարապետյանի մեկնաբանությունը տրամադրել ավելի ուշ:

Նշենք, որ Հայ դատի հանձնախմբի նախաձեռնությամբ, մասնավորապես, վերջին տարիներին Լեռնային Ղարաբաղ են այցելում եվրոպացի քաղաքական, հասարակական և մշակութային գործիչներ, նրանցից շատերը հայտնվել են Ադրբեջանի հայտնի «սև ցուցակում»: