Ավանում ապրիլի 22-ին քաղաքացիների մեքենաների վրա հարձակված անձանցից մեկը թաղապետարանի աշխատակից է. ՔԿ
Ավանում՝ ապրիլի 22-ին քաղաքացիների մեքենաների վրա հարձակված անձանցից մեկը, ում ինքնությունը պարզվել է, Ավանի թաղապետարանի աշխատակից է, «Ազատության» հետ զրույցում ասաց Քննչական կոմիտեի նախագահի խորհրդական Սոնա Տռուզյանը։ Նա անուն-ազգանուն չհրապարակեց։
Հիշեցնենք, որ ապրիլի 22-ին մի քանի տասնյակ դիմակավորված անձինք Ավանում հարձակվել էին դեպի Երևանի կենտրոն գնացող մեքենաների վրա։ «Ֆորդ» սերվիսի մոտ խոչընդոտվել էր նաև «Հանրային Ռադիո» ընկերության աշխատակցի մասնագիտական գործունեությունը։
Կասկածյալի նկատմամբ որպես խափանման միջոց է ընտրվել ստորագրությունը քաղաքից չհեռանալու մասին:
Այդ օրը վնասված մեքենաների սեփականատերերից շատերը գնում էին Նիկոլ Փաշինյանի նախաձեռնած ցույցերին մասնակցելու։
Հետևի՛ր մեզ քեզ հարմար սոցիալական ցանցում