Հայաստանում Ֆրանկոֆոնիայի գագաթնաժողովի շրջանակներում տեղի կունենա «Ֆլեյտայի արքա» Էմանուել Պայուի համերգը
«Ֆլեյտայի արքա» Էմանուել Պայուն առաջին անգամ Հայաստանում կկատարի Արամ Խաչատրյան։
Աշխարհի ամենատիտղոսակիր ֆրասիացի ֆլեյտահարը Երևանյան 12-րդ միջազգային փառատոնի շրջանակներում հոկտեմբերի 3-ին հանդես կգա բացառիկ համերգով: Համերգի ծրագիրը նույնպես եզակի է. Էմանուել Պայուն ՀԱՖՆ-ի հետ կներկայացնի Արամ Խաչատրյան Ջութակի կոնցերտի փոխադրումը ֆլեյտայի համար, երկրորդ բաժնում կունկնդրեք Շոստակովիչի 5-րդ սիմֆոնիան, դիրիժոր՝ Էդուարդ Թոփչյան: Համերգը տեղի կունենա Հայաստանում Ֆրանկոֆոնիայի գագաթնաժողովի շրջանակներում, Արամ Խաչատրյան համերգասրահում ժամը՝ 19:00-ին:
Է. Պայուի երգացանկը բավական ընդգրկուն է՝ դասականից մինչև ջազ: Ձայնագրել է շուրջ 25 ալբոմ EMI և Warner Classics ձայնագրման ստուդիաների հետ, որոնք արժանացել են բարձր գնահատանքի և հեղինակավոր մրցանակների: Կլաուդիո Աբբադոյի հովանավորությամբ՝ 1992թ-ից (22 տարեկան) Պայուն հանդիսանում է Բեռլին Ֆիլհարմոնիկի գլխավոր ֆլեյտահարը:
2009թ.-ին Ֆրանիայի հանրապետության կողմից արժանացել է «Արվեստի ասպետ» տիտղոսին: Լյուցեռնի փառատոնը նրան շնորհել է բարձրագույն՝ “Artiste Étoile” մրցանակ (2006թ.), ըստ Victoires de la Musique հեղինակավոր մրցանակաբաշխություն համարվել է «Տարվա լավագույն կատարող» (1998թ.), Դուինոյի և Կոբեի միջազգային մրցույթների առաջին մրցանակակիր է: Նրա առաջին ձայնասկավառակը (EMI records), որտեղ նա կատարում է Մոցարտի ֆլեյտայի կոնցերտը, 1997-98թթ-ին ստացել է «Տարվա ալբոմ» մրցանակ (ըստ Diapason-ի), ըստ Ռադիո Ֆրանսի հարցումների համարվել է ունկնդիրների տարվա ամենասիրելի ձայնագրությունը, ստացել է Ճապոնիայի Geijutsu Award և Fono-Forum մրցանակները: Ժնևի Կատարողների միջազգային մրցույթում շահել է տասներկու մրցանակներից ութը (1992), գերմանական TV-Echo-ից ունի չորս մրցանակ: Յեհուդի Մենուհին հիմնադրամի և ՅՈՒՆԵՍԿՕ-ի երաժշտական միջազգային խորհրդի մրցանակակիր է: Էմանուել Պայուն Լոնդոնի Royal Academy of Music-ի Պատվավոր անդամ է և ՅՈՒՆԻՍԵՖ-ի դեսպան: